لاہور: محکمہ جنگلی حیات نے تونسہ کے علاقہ میں کارروائی کے دوران نایاب نسل کا عقاب برآمد کرلیا جس کی عالمی مارکیٹ میں قیمت 10 کروڑ روپے سے زائد ہے۔
تفصیلات کے مطابق نایاب جنگلی جانوروں اور پرندوں کے غیرقانونی کاروبار اور اسمگلنگ کے خلاف پنجاب حکومت کا کریک ڈاون جاری ہے۔
ترجمان محکمہ جنگلی حیات کے مطابق خفیہ اطلاع پر محکمہ تحفظ جنگلی حیات اور پولیس نے مشترکہ کارروائی کرکے نایاب عقاب برآمد کرلیا ساتھ ہی ملزم کو بھی گرفتار کرلیا گیاہے۔
ترجمان محکمہ جنگلات کا کہنا ہے کہ نایاب عقاب جسمانی طور پر صحت مند ہے، ملزم نایاب پرندے بیرون ملک اسمگل کرنے میں ملوث ہے۔
دوسری جانب سینئر وزیر مریم اورنگزیب نے وزیراعلی ٰپنجاب کی جانب سے محکمے کو شاباش دی اور کہا کہ عقاب کو ٹریکر کے ساتھ دوبارہ آزاد کیا جائے گا۔
مریم اورنگزیب کا کہنا تھا کہ جنگلات اور جنگلی حیات کے تحفظ کیلئے کارروائیاں جاری ہیں، متعدد نایاب جنگلی جانور اور پرندے برآمد کر کے چڑیا گھر منتقل کیے جاچکے ہیں اس کے علاوہ متعدد جانوروں اور پرندوں کا علاج کر کے جان بچالی گئی ہے۔