اسرائیلی وزیراعظم بن یامین نیتن یاہو نے حزب اللہ کے رہنما حسن نصر اللہ کو دھمکی دیتے ہوئے کہا ہے کہ ہم نے ہر کسی کو نشانے پر رکھا ہوا ہے۔
غیر ملکی ذرائع ابلاغ کے مطابق اسرائیلی وزیر اعظم نے کہا ہے کہ لبنانی عوام کو ہمارے انتباہ کو سنجیدگی سے لینا چاہیے اور اپنے گھروں سے چلے جانا چاہیے۔
اُنہوں نے کہا کہ حزب اللہ گھروں میں میزائل رکھ رہی ہے اور ان سے ہمیں نشانہ بنا رہی ہے ہمیں اپنے دفاع کے لیے حزب اللہ کو جواب دینا ہے۔
نیتن یاہو کا کہنا تھا کہ اسرائیل کی جنگ لبنانی عوام کے خلاف نہیں بلکہ حزب اللہ کے ساتھ ہے، اسرائیلی وزیر ا عظم نے اس بات کا اعادہ کیا کہ اسرائیل لبنان پر بمباری جاری رکھے گا۔
میں نے وعدہ کیا تھا کہ ہم شمال میں دفاع کے توازن اور طاقت کے توازن کو تبدیل کر دیں گے۔ اور یہ بالکل وہی ہے جو ہم کر رہے ہیں۔
تاہم، اسرائیلی وزیر ا عظم نے ساتھ ہی خبردار کیا کہ ان کے ملک کو مشکل دنوں کا سامنا کرنا پڑے گا کیونکہ جنوبی لبنان میں حزب اللہ پر حملوں میں شدت آئے گی۔
اسرائیلی وزیر اعظم کے یہ بیانات اسرائیلی فوج کے اس اعلان کے فوراً بعد سامنے آئے ہیں کہ اس نے لبنان میں حزب اللہ پر اپنے حملوں کا دائرہ بڑھا دیا ہے اور وادی البقاع میں لبنانیوں کو حزب اللہ کے ہتھیاروں کے مقامات کے قریب رہنے والوں کو خبردار کیا ہے کہ وہ ان سے دور ہوجائیں۔
حزب اللہ اسرائیل کشیدگی، پاسداران انقلاب کا اہم اقدام
واضح رہے کہ لبنانی وزارت صحت کا اپنے بیان میں کہنا ہے کہ 23 ستمبر پیر کے روز صبح سے مسلسل پرتشدد اسرائیلی حملوں میں 35 بچوں سمیت 492 افراد جاں بحق اور 1645 زخمی ہوگئے ہیں۔
