ملتان ایئرپورٹ پر کسٹم حکام نے کارروائی کرتے ہوئے مسافر سے 25 موبائل فونز برآمد کرلیے۔
اے آر وائی نیوز کے مطابق کسٹم حکام کا کہنا ہے کہ ملزم زاہد احمد دبئی سے ملتان پہنچا تھا جبکہ 25 موبائل فونز کی مالیت ایک کروڑ روپے ہے۔
کسٹم حکام کا کہنا ہے کہ ملزم نے کپڑوں کے نیچے جیکٹ میں موبائل فون چھپا رکھے تھے۔
کسٹم حکام کا بتانا ہے کہ ملزم کے خلاف مقدمہ درج کرلیا گیا ہے۔
واضح رہے کہ چند روز قبل ایف ائی اے امیگریشن سیل کے عملے نے کراچی ایئر پورٹ پر کارروائی کرتے ہوئے ملائشیا جانے والے مسافر کے موبائل فون سے 47 سے زائد ویزے برآمد کر لیے تھے۔
حکام کا کہنا تھا کہ ملزم علیان زمان وزٹ ویزے پر ملائشیا جا رہا تھا، جس نے دورانِ تفتیش انکشاف کیا تھا کہ اس نے ایجنٹ کی ملی بھگت سے ملائشیا سے یو کے جانے کی کوشش کرنی تھی۔
یاد رہے کہ گزشتہ سال اکتوبر میں کسٹمز نے کراچی ائیرپورٹ پر 92 لاکھ کے موبائل فونز کی اسمگلنگ کی کوشش ناکام بنادی تھی۔
ترجمان کسٹمز نے بتایا تھا کہ ملزم خاتون کے قبضے سے 23 قیمتی موبائل فون برآمد ہوئے تھے، موبائل فونز قبضے میں لے کرملزمہ کو گرفتار کر لیا گیا تھا۔