کراچی: ایئرپورٹ سے متصل ہوٹل میں رہائش پزیر دو خواتین پُراسرار طور پر جاں بحق ہوگئیں۔
کراچی ایئر پورٹ کے ہوٹل میں دو خواتین مردہ حالت میں ملیں، ترجمان پی آئی اے خواتین کی پراسرار ہلاکت کو طبعی موت قرار دے رہے ہیں ۔
ترجمان پی آئی اے اور ایئرپورٹ پولیس کے مطابق دونوں خواتین اپنے اہل خانہ کے ہمراہ عمرہ کرکے آج ہی جدہ سے کراچی پہنچی تھی، جہاں سے انہوں نے لاہور اور پشاور روانہ ہونا تھا، جاں بحق خواتین کی شناخت گل حسینی اور ممتاز اختر کے نام سے ہوئی ہے۔
گل حسینی کی میت پشاور جبکہ ممتاز اختر کی میت لاہور جائے گی۔
ابتدائی طور پر دونوں خواتین کا وجہ انتقال طبی موت لگ رہا ہے، تاہم دونوں خواتین کی لاشیں نجی اسپتال منتقل کی گئی ہیں، جہاں پر وجہ موت کا مزید تعین کیا جارہا ہے اور حتمی طور پر میڈیکل رپورٹ آنے کے بعد ہی معلوم ہوسکے گا۔
دونوں خواتین کی لاشیں کچھ دیر میں ان کے آبائی علاقوں میں بھیج دی جائیں گی۔
