نوجوان کسی بھی قوم کا سرمایہ اور روشن مستقبل کی ضمانت ہوتے ہیں، قوم کی ریڑھ کی ہڈی حیثیت رکھنے والے یہ نوجوان اپنی قسمت بدلنے کی صلاحیت بھی رکھتے ہیں لیکن اس کیلئے ضروری ہے کہ ان کی صحیح خطوط پر رہنمائی کی جائے۔
ہمارے ارد گرد ایسے لوگ بھی ہوتے ہیں جو ایک کامیاب کیریئر رکھتے ہیں اور اپنے شعبہ جات میں نمایاں عہدوں پر براجمان اور بااختیار ہوتے ہیں وہ اپنی محنت اور لگن سے بتدریج کامیابی کی منازل بھی طے کرتے ہیں۔
لیکن یہ محض اتفاق نہیں ہوتا اس کے پیچھے ان کی بہترین حمکت عملی اساتذہ کی تربیت اور سب سے بڑھ کر قسمت ہوتی ہے لیکن قسمت بھی اسی وقت ساتھ دیتی ہے جب وہ ملنے والے مواقع اور مراحل طے کرنے کیلئے مکمل تیاری کے ساتھ میدان عمل میں اترتے ہیں۔
زیر نظر مضمون میں ان 5 نکات کا احاطہ کیا گیا ہے کہ جن پر عمل کرکے نوجوان طلبہ و طالبات اپنے کیریئر کو محفوظ کامیاب اور اپنے مستقبل کو تابناک بنا سکتے ہیں۔
آئیے جانتے ہیں کہ اپنے کیریئر کو بہتر بنانے کیلئے نوجوانوں کو کیا کرنا چاہیے اور ایسی کون سی سمتوں کا تعین کریں کہ جس سے ان کو آگے بڑھنے میں کسی دشواری کا سامنا نہ کرنا پڑے؟
1 : سرپرست تلاش کریں
اپنے کیریئر میں ترقی کے لیے ایک سرپرست یا رہنما کو تلاش کریں، یہ آپ کا قائد، پڑوسی محکمہ کا سربراہ حتیٰ کہ آپ کا کوئی دوست بھی ہو سکتا ہے اور اگر آپ کے حلقہ احباب میں کوئی ایسی شخصیت نہیں ہے تو اپنی قیادت سے درخواست کریں کہ وہ ملازمین کو سرپرستوں کے ساتھ جوڑیں۔
جب آپ کو سرپرست میسر ہوجائے تو اس سے سیکھیں، اپنی غلطیوں کی نشاندہی اور اصلاح کرنے کی درخواست کریں اور اس سے نئے مواقع کے بارے میں رہنمائی حاصل کریں۔
یہ بات ہرگز نہ سوچیں کہ کوئی آپ کو کچھ نہیں بتائے گا، ہر کسی کو یہ بات پسند ہوتی ہے کہ جب کسی سے اس کے کام، تجربے اور کامیابیوں کے بارے میں دریافت کیا جائے۔
2 : اپنے حلقہ احباب کو وسعت دیں
ایک ایسی ملازمت تلاش کریں جو لوگوں سے آپ کے رابطے بڑھانے کے راستے میں رکاوٹ نہ بنے بلکہ اسے تقویت دے۔ لوگوں سے ملنا، مختلف اور پیشہ ورانہ موضوعات پر کھل کر تبادلہ خیال کرنا، کانفرنسوں، سیمیناروں میں شرکت کرنا۔ یاد رکھیں یہ سب آپ کے نیٹ ورک کو مضبوط بنانے میں مدد فراہم کرتے ہیں۔
آپ کی نوٹ بک میں کتنے پیشہ ورانہ رابطے ہیں جن کے ساتھ آپ پروفیشنل معاملات پر بات چیت کر سکتے ہیں؟ آپ کے پاس ابتدائی طور پر ایسے 150 سے زائد ٹیلی فونک رابطے ہونا چاہئیں۔
3 : کتابوں کا مطالعہ
ایک ایسا رہنما جو اپنے لوگوں میں سب سے بہترین ہو اور جو کھلے ذہن کے ساتھ لوگوں کی بات سن سکتا ہو سمجھ سکتا ہو اور صحیح وقت پر "نہ” کہنے کی صلاحیت رکھتا ہو، اس کے علاوہ حالات کی مطابقت سے مسائل کا حل نکال سکتا ہو۔
اس کے لیے ضروری ہے کہ آپ کو بہت سی کتابوں کا مطالعہ کرنا ہوگا، جیسا کہ نفسیات، مینجمنٹ، موٹیویشن، اور ٹائم مینجمنٹ کے موضوعات پر لکھی گئی کتابیں۔ ایک سال میں 25 سے 30کتابوں کا مطالعہ کرنا ایک بہترین ہدف ہے اور یہ ناممکن بھی نہیں ہے۔
اس کے علاوہ لیڈرشپ کی مہارتوں میں اضافے کے لیے سال میں کم ازکم دو سے تین مرتبہ ٹریننگ سیشنز میں بھی شرکت کریں۔
4 : خود کو مفید بنائیں
اپنی کارکردگی کو مزید بہتر بنانے کیلئے اپنا کام اچھے اور منظم طریقے سے کریں تاکہ کوئی آپ کی جگہ لینے کا سوچے بھی نہیں، اس کا فائدہ یہ ہوگا کہ آپ کو کمپنی میں ترقی ملنے کے زیادہ امکانات ہوں گے، نفسیاتی طور پر اس بات کیلئے بھی تیار رہیں کہ کسی اور بہتر پیشکش کے لیے کمپنی چھوڑ سکیں۔
یاد رکھیں !! آپ کے افسران صرف یہ سوچ کر آپ کو کھونے سے خوفزدہ ہوں کہ جب یہ شخص اس عہدے سے چلا جائے گا جہاں وہ اس وقت کام کر رہا ہے تو کام کا کیا ہوگا؟ اور وہ یہ سوچیں کہ آپ کو جانے سے کیسے روکا جائے؟۔
5 : ملازمت کی جگہ تبدیل کریں
کیرئیر کی ترقی کے لیے ضروری ہے کہ آپ وقتاً فوقتاً اپنی نوکری تبدیل کرتے رہیں لیکن اس بات کا دھیان رکھیں کہ کسی پراجیکٹ کو مکمل کیے بغیر جانے سے آپ کی ساکھ متاثر ہو سکتی ہے۔ لہٰذا بہترین حکمت عملی یہ ہے کہ ایک پراجیکٹ کو مکمل کریں اور پھر کسی نئی جگہ نوکری ڈھونڈیں۔
کامیاب کیرئیر کا مطلب ہے کہ آپ ترقی کے حصول کیلئے مستقل تگ و دو کرتے رہیں اور جب آپ کی موجودہ کمپنی میں ترقی کے مواقع کم ہوں تو نئی ملازمت کی تلاش شروع کردیں۔
خلاصہ :
یہ بات ذہن میں رکھیں کہ ایک رہنما کا راستہ مشکل راستہ ہوتا ہے، آپ کو اپنے ’کمفرٹ زون‘ سے باہر نکلنا ہوگا، مشکل اور پیچیدہ فیصلے کرنا ہوں گے اور ان کے نتائج کی ذمہ داری بھی لینا ہوگی۔ ایک کامیاب لیڈر ایک منظم، ذمہ دار اور بات کرنے سے زیادہ سننے والا شخص ہوتا ہے۔
یاد رکھیں!! آپ ہمیشہ اپنی ترقی اور مستقبل کی بہتری اور ترقی کی منازل خود بہتر طور پر طے کرسکتے ہیں۔
