کوٹ ادو کی تحصیل چوک سرور شہید میں شادی کی تقریب میں ہوائی فائرنگ کے نتیجے میں ایک باراتی جاں بحق ہوگیا۔
پولیس کے مطابق اڈہ ریاض آباد میں شادی کی تقریب میں ہوائی فائرنگ کی گئی، فائرنگ کی زد میں آکر 17 سالہ باراتی اسد موقع پر ہی جاں بحق ہوگیا۔
پولیس کا کہنا ہے کہ نوجوان کی لاش کو پوسٹ مارٹم کے لیے ٹی ایچ کیو اسپتال چوک سرور شہید منتقل کردی گئی ہے، تھانہ صدر چوک سرور شہید پولیس نے قانونی کارروائی شروع کردی۔
- Advertisement -
یاد رہے کہ اسی ماہ راولپنڈی میں بھی ایک ایسا ہی افسوسناک واقعہ پیش آیا تھا، جہاں شادی کی تقریب میں باراتیوں کی ہوائی فائرنگ سے 8 سالہ بچہ جاں بحق اور 7 سالہ بچی شدید زخمی ہوگئی تھی۔
پولیس ذرائع کے مطابق 8 سالہ محمد عیسی نے اسپتال لے جاتے ہوئے دم توڑا جبکہ زخمی بچی کو راولپنڈی منتقل کردیا گیا ہے۔
