امریکی صدر جو بائیڈن نے کہا ہے کہ امریکا کی بیروت حملے میں کوئی شراکت یا اس حوالے سے علم نہیں تھا۔
غیر ملکی ذرائع ابلاغ کے مطابق گزشتہ روز لبنان کے شہر بیروت پر ہونے والے حملے پر بات کرتے ہوئے امریکی صدر بائیڈن نے کہا کہ امریکا کو بیروت حملے کا کوئی علم نہیں تھا۔
واضح رہے کہ اسرائیل کی جانب سے بیروت پر کی گئی وحشیانہ بمباری کے بعد ایرانی سپریم لیڈر آیت اللہ خامنہ ای نے نیشنل سیکیورٹی کونسل کا ہنگامی اجلاس بلالیا ہے۔
رپورٹس کے مطابق ایرانی سپریم لیڈر آیت اللہ خامنہ ای کے مشیر علی لاریجانی نے کہا ہے کہ اسرائیل نے سرخ لکیر عبور کردی ہے۔
انہوں نے کہا کہ حزب اللہ کے پاس قائدانہ صلاحیت رکھنے والے بہت سارے کمانڈر اور رہنما موجود ہیں جو حسن نصر اللہ کی شہادت کی صورت میں متبادل قیادت تحریک کو چلانے کے لئے تیار ہے۔
ایرانی میڈیا کی جانب سے یہ دعویٰ کیا جارہا ہے کہ حزب اللہ کے سیکریٹری جنرل سید حسن نصر اللّٰہ اور تحریک کی ایگزیکٹو کونسل کے سربراہ سید ہاشم صفی الدین بالکل صحت مند ہیں۔
اسرائیلی حملے سے حزب اللہ رہنماء کو کوئی نقصان نہیں ہوا، تاہم حزب اللہ کی جانب سے تاحال اس بارے میں کوئی تصدیق یا تردید سامنے نہیں آئی ہے۔
ایرانی میڈیا کی جانب سے لبنان میں موجود اپنے نمائندے کی بنیاد پر یہ دعویٰ سامنے آرہا ہے کہ جمعہ کی شام کیے گئے اسرائیلی حملے میں حزب اللہ کی قیادت کا کوئی بھی شخص شہید نہیں ہوا، اسرائیل کو شرمندگی کا سامنا کرنا پڑا ہے۔
یمنی افواج کا امریکی بحریہ کے جہازوں پر بڑا حملہ
لبنان میں گزشتہ روز کئے جانے والے حملے کے بعد تل ابیب میں حملوں کا الرٹ جاری کرکے فضائی دفاعی نظام ہائی الرٹ کر دیا گیا ہے اور شیلٹرز کو بھی کھول دیا گیا ہے۔
