ایرانی وزیر خارجہ عباس عراقچی نے کہا ہے کہ اسرائیل نے بیروت حملے میں امریکی بنکر بسٹر بموں کو استعمال کیا۔
غیر ملکی ذرائع ابلاغ کے مطابق ایرانی وزیر خارجہ عباس عراقچی نے کہا کہ ایران ہر صورت لبنان اور مزاحمت کا ساتھ دے گا، انہوں نے کہا کہ بیروت حملے میں امریکی بنکر بسٹر بم استعمال کئے گئے۔
جبکہ امریکی صدر جو بائیڈن نے کہا ہے کہ امریکا کی بیروت پر حملے میں کوئی شراکت یا اس حوالے سے علم نہیں تھا۔
بائیڈن نے گزشتہ روز لبنان کے شہر بیروت پر ہونے والے حملے پر بات کرتے ہوئے کہا کہ امریکا کو بیروت حملے کا کوئی علم نہیں تھا۔
واضح رہے کہ اسرائیل کی جانب سے بیروت پر کی گئی وحشیانہ بمباری کے بعد ایرانی سپریم لیڈر آیت اللہ خامنہ ای نے نیشنل سیکیورٹی کونسل کا ہنگامی اجلاس بلالیا ہے۔
رپورٹس کے مطابق ایرانی سپریم لیڈر آیت اللہ خامنہ ای کے مشیر علی لاریجانی نے کہا ہے کہ اسرائیل نے سرخ لکیر عبور کردی ہے۔
انہوں نے کہا کہ حزب اللہ کے پاس قائدانہ صلاحیت رکھنے والے بہت سارے کمانڈر اور رہنما موجود ہیں جو حسن نصر اللہ کی شہادت کی صورت میں متبادل قیادت تحریک کو چلانے کے لئے تیار ہے۔
حسن نصر اللہ سے متعلق ایرانی میڈیا کا بڑا دعویٰ
ایرانی میڈیا کی جانب سے یہ دعویٰ کیا جارہا ہے کہ حزب اللہ کے سیکریٹری جنرل سید حسن نصر اللّٰہ اور تحریک کی ایگزیکٹو کونسل کے سربراہ سید ہاشم صفی الدین بالکل صحت مند ہیں۔
