ممبئی: بالی ووڈ کے مشہور اداکار نواب سیف علی خان نے اپنے کرداروں کے ذریعہ لوگوں کے دلوں میں ایک خاص مقام بنایا ہے۔
بالی ووڈ کے نواب زادے کا مشہور کردار لنگڑا تیاگی فلم اومکارا میں آج بھی لوگوں کے ذہنوں پر نقش ہے، اب یہ انکشاف ہوا ہے کہ سیف علی خان کانگریس لیڈر راہول گاندھی کے مداح ہیں۔
انڈیا ٹوڈے سے سیف علی خان نے راہول گاندھی کی تعریف کرتے ہوئے کہا کہ وہ ایک بہادر اور ایماندار سیاستدان ہیں جو تنقید کا مؤثر طریقہ سے سامنا کرنا جانتے ہیں۔
سیف علی خان سے پوچھا گیا کہ نریندر مودی، راہول گاندھی یا اروند کیجریوال میں سے وہ کس کو ہندوستان کا مستقبل سمجھتے ہیں؟
جس پر سیف علی خان نے کہا کہ تینوں ہی بہادر سیاستدان ہیں، لیکن راہول گاندھی نے اپنی محنت سے جو تبدیلیاں کی ہیں، وہ بے حد متاثر کن ہیں۔
اداکار سیف علی خان نے مزید کہا کہ ایک وقت تھا جب لوگ راہول گاندھی کا مذاق اڑاتے تھے، لیکن اب انہوں نے خود کو ثابت کر کے ان تمام تنقیدوں کو خاموش کر دیا ہے۔
