کراچی : آرمی چیف جنرل عاصم منیر نے کراچی کے تاجروں کو ایس آئی ایف سی کے ساتھ مل کر کام کرنے کی دعوت دیتے ہوئے ترجیحی بنیادوں پر مسائل کے حل کی یقین دہانی کرادی۔
تفصیلات کے مطابق آرمی چیف جنرل عاصم منیر نے دورہ کراچی کےدوران تاجر برادری سے ملاقات کی ، ملاقات میں معیشت سےمتعلق تاجربرادری کےساتھ اہم امورزیربحث آئے۔
جنرل عاصم منیر نے کہا کہ ایک سال پہلے آپ سب سے کہا تھا کہ مایوس مت ہوں۔۔ مایوسی گناہ ہے۔۔ پاکستان کی خوشحالی کے بارے میں کبھی امید نہیں چھوڑنا، مایوسی پیدا کرنے کی ناکام کوششوں کو اجتماعی کاوشوں سے شکست دی گئی۔
ان کا کہنا تھا کہ پاکستان مختلف شعبوں میں غیر معمولی صلاحیت رکھتا ہے، بے پناہ وسائل اور صلاحیت کے پیش نظر پاکستان اقوام عالم میں اپنا جائز مقام حاصل کرنا چاہتا ہے۔
سپہ سالار نے کہا مغربی سرحد پر اسمگلنگ پر قابو پانے سے معیشت پر مثبت اثرات مرتب ہوئے، برادر دوست ملکوں نے پاکستان کی معاشی بحالی میں اہم کردار ادا کیا۔۔ بالخصوص چین، سعودی عرب اور متحدہ عرب امارات کی کاوشیں قابل ستائش ہیں۔
انھوں نے بتایا کہ گوگل، اسٹار لنک اور دیگر بین الاقوامی کمپنیاں پاکستان میں سرمایہ کاری کررہی ہیں، کاروباری برادری کے تعاون کے بغیر یہ کامیابیاں ممکن نہ تھیں۔۔ پاکستان کے روشن مستقبل پر سب کو غیر متزلزل اعتماد ہونا چاہیے۔
انھوں نے تاجروں کو یقین دلایا کہ پاک افواج غیرقانونی سرگرمیوں کیخلاف کارروائیاں جاری رکھنے کیلئے پُرعزم ہے اور کراچی کی کاروباری برادری کے مسائل ترجیحی بنیادوں پر حل کیے جائیں گے۔
سپہ سالار نے تاجر برادری کو معاشی ترقی میں کردار ادا کرنے اور ایس آئی ایف سی کے ساتھ مل کر کام کرنے کی دعوت بھی دی۔
