پنجگور کے علاقے خدا آبادان میں نامعلوم مسلح افراد کی فائرنگ سے 7افراد کے جاں بحق ہونے کا واقعہ پیش آیا ہے، فائرنگ سے ایک شخص زخمی بھی ہوا۔
اس حوالے سے پولیس حکام کا کہنا ہے کہ پنجگور میں نامعلوم مسلح افراد کی جانب سے ایک کوارٹر پر کی جانے والی فائرنگ سے 7افراد جاں بحق اور ایک شخص زخمی ہوگیا۔
پنجگور پولیس کے مطابق جاں بحق افراد کا تعلق پنجاب کے مختلف علاقوں سے ہے، جاں بحق افراد کی لاشوں کے پوسٹ مارٹم اور زخمیوں کو طبی امداد کی فراہمی کیلئے متعلقہ اسپتال منتقل کردیا گیا۔
ہلاک شدگان کا تعلق پنجاب کے شہر ملتان سمیت دیگر علاقوں سے تھا یہ تمام مزدور ایک کوارٹر میں مقیم تھے۔
مسلح افراد نے کوارٹر میں گھس کر تمام مزدوروں پر گولیاں برسا دیں مقتولین نے موقع پر ہی دم توڑ دیا، پولیس نے علاقے کی ناکہ بندی کرکے ملزمان کی گرفتاری کیلئے سرچ آپریشن شروع کردیا ہے۔
وفاقی وزیرداخلہ محسن نقوی نے پنجگور کے علاقے میں مزدوروں کے قتل کی مذمت کی ہے، وزیر داخلہ محسن نقوی کا 7 مزدوروں کے جاں بحق ہونے پر گہرے دکھ اور افسوس کا اظہار کیا ہے۔
اپنے بیان میں ان کا کہنا ہے کہ بے گناہ مزدوروں پر فائرنگ کرنے والے عناصرکسی رعایت کے مستحق نہیں، تمام ترہمدردیاں جاں بحق مزدوروں کے لواحقین کے ساتھ ہیں۔
