بیروت: حزب اللہ کے سربراہ حسن نصراللہ کی شہادت پر لبنان میں 3 روزہ سوگ کا اعلان کیا گیا ہے۔
تفصیلات کے مطابق لبنان کی حزب اللہ کے سربراہ حسن نصر اللہ کی شہادت کے بعد لبنان میں کل سے تین روزہ سوگ ہوگا، لبنانی وزیر اعظم نے کہا کہ سرکاری عمارتوں پر پرچم سرنگوں رہے گا۔
حسن نصراللہ کی تدفین تک سرکاری ادارے بند رہیں گے، حزب اللہ کے سربراہ حسن نصر اللہ کی اسرائیلی حملے میں شہادت کے بعد نعیم قاسم تنظیم کے عبوری سربراہ مقرر کر دیے گئے ہیں۔
نعیم قاسم 1992 میں حزب اللہ کے ڈپٹی سیکریٹری جنرل مقرر ہوئے تھے، نعیم قاسم حزب اللہ شوریٰ کمیٹی کے مسلسل 3 مرتبہ رکن بھی رہ چکے ہیں۔
واضح رہے کہ دو دن قبل اسرائیل نے بیروت میں ایک بنکر بسٹر میزائل حملہ کر کے حزب اللہ کے کئی رہنماؤں کو قتل کر دیا تھا، حملے کے وقت حسن نصراللہ بھی 6 عمارتوں کے نیچے بنائے گئے بنکر میں موجود تھے، حزب اللہ کے جس ہیڈکوارٹر پر حملہ کیا گیا وہ رہائشی عمارتوں کے نیچے تھا۔
امریکی صدر نے حسن نصراللہ کی شہادت اسرائیل کا منصفانہ اقدام قرار دے دیا
ترجمان حزب اللہ نے ایک بیان میں کہا کہ گروپ کے سینئر رہنما علی کرکی، حسن نصر اللہ کی بیٹی زینب بھی اسرائیلی حملے میں شہید ہوئی ہیں، شام لبنان میں القدس فورس کے کمانڈر عباس نیلفوروشن بھی اس حملے میں شہید ہوئے۔
