پنجگور : دہشت گردی کا نشانہ بننے والے مزدروں کی نماز جنازہ ادا کردی گئی، اس موقع پر ہرآنکھ اشک بار تھی اور لواحقین غم سے نڈھال ہے۔
تفصیلات کے مطابق بلوچستان کے علاقے پنجگور میں خداآبادان کے مقام پر میں دہشت گردی کا نشانہ بننے والے سات مزدوروں کی میتیں شجاع آباد پہنچائی گئیں تو علاقے میں کہرام مچا ہوا تھا، ہر آنکھ میں آنسو تھے، لواحقین غم سے نڈھال تھے
دہشت گردوں کی سفاکیت کا نشانہ بننے والے مزدروں کی نماز جنازہ ادا کی گئی، چار مزدوروں فیاض حسین ، محمد سلمان، محمد ساجد اور محمد خالد کی نماز جنازہ بستی ملوک چڈھر موڑ عید گاہ، شجاع آباد میں ادا کی گئی جب کہ شہید محمد شفیق، محمد رمضان اور افتخار احمد کی نماز جنازہ الکوثر جنازہ گاہ شجاع آباد میں ادا کی گئی۔
نماز جنازہ میں پولیس، ضلعی انتظامیہ، سیاسی و سماجی شخصیات اور اہل علاقہ کی بڑی تعداد شریک ہوئی ، شہداء کے لواحقین نے اس دہشت گردی کے واقعے پر گہرے دکھ اور غم و غصے کا اظہار کیا۔
لواحقین نے حکومت سے دہشت گردوں کو عبرتناک سزا دینے کا مطالبہ کیا اور معصوم مزدوروں کے سفاکانہ قتل کی بھرپور مذمت کی اور کہا بلوچستان میں آئے روز مزدوروں کا قتل عام اور دہشت گردی کی جارہی ہے، جسے روکنے کیلئے ٹھوس اقدامات کیے جائیں۔
یاد رہے بلوچستان کے ضلع پنجگور میں دہشت گردوں نے ایک بار پھر معصوم لوگوں کو ٹارگٹ کیا، اور سات مزدوروں کو قتل کردیا، تمام افراد رشتے دار تھے اور اپنا گھر بار چلانے کیلئے پنجگور جاکرمزدوری کرتے تھے۔
