ڈھاکا: بنگلادیش میں پاکستانی بینڈ کی 14 سال بعد پرفارمنس دیکھنے کے لیے لوگ بے قابو ہو گئے، جھڑپیں ہونے پر فوج طلب کر لی گئی۔
غیر ملکی میڈیا رپورٹس کے مطابق بنگلادیش کے دارالحکومت ڈھاکا میں معروف پاپ سنگنگ بینڈ ’جل‘ کی چودہ سال بعد پرفارمنس ہوئی، پرستاروں کا جوش و خروش اتنا زیادہ تھا کہ وہ بے قابو ہو گئے۔
کنسرٹ کے مقام پر گنجائش سے زیادہ لوگ آ گئے تھے جن میں سے اکثر ٹکٹ لیے بغیر زبردستی کنسرٹ میں داخل ہوئے، شدید بدنظمی کے باعث انتظامیہ کو کنٹرول کرنے کے لیے فوج بلانی پڑی۔
ابتدائی طور پر کنسرٹ کے لیے ڈھاکا ارینا کا انتخاب کیا گیا تھا تاہم بارش کے باعث مقام تبدیل کر کے ایک مال میں کنسرٹ کا اہتمام کیا گیا، منتظمین کے مطابق ہنگامی طور پر مقام تبدیل کرنے سے کنسرٹ میں شدید بدنظمی دیکھی گئی۔
ہنگامہ آرائی اور فوج طلب کیے جانے کے بعد جل بینڈ کو اپنی پرفارمنس کو درمیان میں ہی روکنا پڑا۔
اس کونسرٹ کے ساتھ جل نے اپنی پہلی البم ’عادت‘ کی ریلیز کے 20 سال مکمل ہونے کی خوشی بھی منائی، یہ ایک ایسا میوزک ریکارڈ تھا جس نے جنوبی ایشیا کے پاپ راک کا ماحول ہی بدل کر رکھ دیا تھا۔ اس کونسرٹ میں بنگلادیش کے معروف اور پسندیدہ بینڈ آرتھوہن نے بھی ایک سال کے وقفے کے بعد دوبارہ اسٹیج پر واپسی کی۔
