اسلام آباد : پاکستان میں ریل کا سفر ہمسایہ ممالک کے مقابلے میں سب سے غیر محفوظ ہونے کا انکشاف سامنے آیا، حادثات میں 631 مسافر جان سے گئے جبکہ 780 شدید زخمی ہوئے۔
ریلوے کے حفاظتی اقدامات میں بڑی خامیوں کی نشاندہی،ہوش ربا اعداد و شمار سامنے آگئے، جس میں بتایا گیا کہ نو برس کے دوران حادثات میں 631 مسافر جان سے گئے، 780 شدید زخمی ہوئے۔
رپورٹ میں بتایا گیا کہ ملک میں ہر برس 70 سے زائد مسافر جان سے ہاتھ دھو بیٹھتے ہیں، پاکستان میں ٹرین حادثات کا تناسب ہمسایہ ملکوں کے مقابلے میں سب سے زیادہ ہے، سال 2013 سے 2021 تک ایک ہزار 97 حادثات رپورٹ ہوئے۔
آڈٹ رپورٹ میں کہا گیا کہ پاکستان ریلوے میں سالانہ 100 سے زائد حادثات رونما ہوتے ہیں، بڑے حادثات کی تعداد 360،محکمہ ریلوے کو 3517.4 ملین روپے کا نقصان ہوا۔
حادثات سے متعلق ڈائریکٹوریٹ جنرل آف آڈٹ ریلوے، لاہور کی تحقیقاتی رپورٹ میں ریلوے نیٹ ورک پر 1565 بغیر پھاٹک والے کراسنگ ٹرین حادثات کی بڑی وجہ قرار دی گئی ہے، ٹریفک قوانین کی خلاف ورزیوں کے سبب ٹرین سے ٹکرانے کے 493 حادثات رونما ہوئے۔
پاکستان ریلوے نے ان مالی نقصانات کو اپنے اکاؤنٹس میں ظاہر نہیں کیا، ریلوے اڈیٹر جنرل کی رپورٹ 46 صفحات پر مشتمل ہے۔
آڈٹ نے بین الاقوامی تسلیم شدہ "سیفٹی انڈیکس ماڈل” کے ذریعہ پاکستان میں حادثات کا دیگر ممالک سے موازنہ کیا تو پاکستان میں فی ملین کلومیٹر ٹرین کے سفر میں 117 سے 164 حادثات رونما ہوئے، حادثات کے نقصانات میں کمی کے لیے فوری اقدامات کی ضرورت ہے۔
