بغداد: آپ کو یہ جان کر حیرت ہوگی کہ حسن نصر اللہ کا انتقال 27 ستمبر کو ہوا اور ایک ہفتے سے بھی کم عرصے میں عراق میں 100 ’نصر اللہ‘ پیدا ہو چکے ہیں، دراصل والدین نوزائیدہ بچوں کے نام ان کے نام پر رکھنے لگے ہیں۔
حزب اللہ کے رہنما حسن نصر اللہ کے لبنان کے شہر بیروت میں اسرائیلی فضائی حملے میں شہادت کے بعد متعدد عراقی والدین نے اپنے نوزائیدہ بچوں کے نام ان کے نام پر رکھ لیے۔
عراق کی وزارت صحت کے مطابق 27 ستمبر کے بعد سے جب اسرائیل نے حزب اللہ کے سربراہ کو قتل کیا، عراق میں 100 سے زائد بچوں کے نام نصراللہ رکھے گئے ہیں۔ وزارت نے عراق کے مختلف علاقوں میں سو سے زائد بچوں کی پیدائشوں کا اندراج کیا ہے۔
عراقی میڈیا کا کہنا ہے کہ بچوں کے نام نصراللہ کے نام پر اس لیے رکھے گئے ہیں تاکہ اسرائیل کے سامنے مزاحمت کرنے والے اس شہید کو خراج تحسین پیش کیا جا سکے۔ عراق نے نصراللہ کی شہادت کے اعزاز میں تین روزہ قومی سوگ کا اعلان بھی کیا تھا۔
حزب اللہ نے میزائل مار کر اسرائیلی ہیلی کاپٹر کو بھاگنے پر مجبور کر دیا
یاد رہے کہ حزب اللہ کے نظریاتی اور تزویراتی رہنما حسن نصر اللہ بیروت میں اسرائیلی فضائی حملے میں مارے گئے تھے، انھوں نے 32 سال تک طاقت ور شیعہ مسلح گروپ کی قیادت کی اور اسرائیل اور مغرب کے علاوہ بھی اپنے علاقائی دشمن بنائے۔ انھیں متعدد عرب ممالک میں اسرائیلی اور مغربی اثر و رسوخ کے خلاف مزاحمت کی علامت سمجھا جاتا تھا۔
عراق میں حسن نصر اللہ نے خاص طور پر اکثریتی شیعہ آبادی میں کافی حمایت حاصل کی، ان کے قتل نے عراق کے لوگوں میں غصے کو جنم دیا اور ملک میں بڑے پیمانے پر مظاہرے دیکھنے میں آئے، اسرائیل کے اقدامات کی مذمت کی گئی اور ان کے قتل کو بین الاقوامی قوانین کی خلاف ورزی قرار دیا گیا۔
