انٹرنیشنل مونیٹری فنڈ کی جانب سے پاکستان کو قرض کی پہلی قسط موصول ہونے پر زرِمبادلہ کے ذخائر میں نمایا اضافہ ہوگیا۔
تفصیلات کے مطابق اسٹیٹ بینک آف پاکستان نے بتایا کہ ملکی زرِمبادلہ کے ذخائر میں اضافہ ہوگیا ہے، پاکستان کے زرمبادلہ کے ذخائر بڑھ کر 15.98 ارب ڈالرز ہوگئے ہیں، اس وقت مرکزی بینک کے پاس زرِمبادلہ کے ذخائر 10.7 ارب ڈالرز ہوگئے ہیں۔
اسٹیٹ بینک کا مزید کہنا تھا کہ آئی ایم ایف سے قرض کی پہلی قسط ملنے پر زرِمبادلہ کے ذخائر بڑھے، کمرشل بینکوں کے پاس 5.28 ارب ڈالرز کے ذخائر موجود ہیں۔
خیال رہے کہ گزشتہ ہفتے پاکستانی معیشت کے لیے بڑی خوشخبری آئی تھی، عالمی مالیاتی فنڈ (آئی ایم ایف) کے ایگزیکٹیو بورڈ نے پاکستان کیلیے 7 ارب ڈالرز کے بیل آؤٹ پیکج کی منظوری دی تھی۔
پاکستان کیلیے آئی ایم ایف قرض پروگرام کی مدت 37 ماہ ہوگی جبکہ اس کی پہلی قسط 30 ستمبر تک پاکستان کو ملنے کے امکانات ظاہر کیے گئے تھے، قرض کی منظوری کے ساتھ بیرونی ادائیگیوں کا دباؤ بھی ختم ہوگیا ہے۔