پشاور: پشاور ہائیکورٹ نے وزیر اعلیٰ خیبر پختونخوا علی امین گنڈاپور کی حفاظتی ضمانت منظور کر لی۔
تفصیلات کے مطابق پشاور ہائیکورٹ نے وزیر اعلیٰ علی امین گنڈاپور کی حفاظتی ضمانت کی درخواست پر تحریری حکم نامہ جاری کر دیا ہے۔
تحریری حکم نامے میں کہا گیا ہے کہ درخواست گزار صوبے کا وزیر اعلیٰ ہے، وکیل کے مطابق وفاق اور پنجاب حکومت علی امین کو گرفتار کرنا چاہتی ہے، یہ خدشات درست ہیں۔
عدالتی حکم نامے میں مزید کہا گیا ہے کہ درخواست گزار نے عدالت کے سامنے خود ک وسرنڈر کر لیا ہے، اس لیے درخواست کو جزوی طور پر منظور کیا جاتا ہے اور حفاظتی ضمانت دی جاتی ہے۔
عدالت نے حکم دیا کہ درخواست گزار کو کوئی بھی پولیس یا ادارہ گرفتار نہ کرے، اور درخواست گزار 5 نومبر تک متعلقہ عدالتوں میں پیش ہوں۔
علی امین گنڈ اپور معاملہ: بھائی نے کی گرفتاری کی تصدیق، سرکاری ذرائع کی تردید
واضح رہے کہ آج ڈسٹرکٹ اینڈ سیشن کورٹس اسلام آباد نے غیر قانونی اسلحہ و شراب برآمدگی کیس میں وزیر اعلیٰ خیبر پختونخواہ علی امین گنڈا پور کے ناقابل ضمانت وارنٹ گرفتاری جاری کیے ہیں۔
جوڈیشل مجسٹریٹ مبشر حسین زیدی نے تھانہ بہارہ کہو میں درج مقدمے کی سماعت کرتے ہوئے کہا کہ متعدد مرتبہ عدالتی طلبی کے باوجود وزیر اعلیٰ کے پی پیش نہ ہوئے، ان کو گرفتار کر کے آئندہ سماعت پر عدالت پیش کیا جائے، عدالت نے گرفتاری کا حکم دینے کے بعد کیس کی سماعت 12 اکتوبر تک ملتوی کر دی۔
علی امین گنڈ اپور کے ناقابل ضمانت وارنٹ گرفتاری جاری
ادھر اسلام آباد میں گنڈاپور کی گرفتاری کا ہنگامہ مچ گیا ہے، ان کے بھائی کے علاوہ پی ٹی آئی رہنما عمر ایوب کا بھی کہنا تھا کہ علی امین گنڈاپور کو خیبر پختونخوا ہاؤس سے حراست میں لے لیا گیا ہے، بیرسٹر سیف کا کہنا تھا کہ پولیس نے خیبر پختونخوا ہاؤس کو سیل کر دیا ہے، اور وزیر اعلیٰ سے رابطہ نہیں ہو رہا۔
تاہم حکومتی ذرائع نے ان کی گرفتاری کی تردید کی، مگر اس سے قبل یہ بتایا گیا تھا کہ وزیر اعلیٰ کے پی کے خلاف ریاست پر حملہ آور ہونے، سرکاری املاک کو نقصان پہنچانے اور سرکاری وسائل کے غلط استعمال پر کارروائی کی جا رہی ہے۔
