پشاور: ترجمان خیبرپختونخوا حکومت بیرسٹرسیف نے کہا ہے کہ ایک علی امین گنڈاپور سے جعلی حکومت کی کانپیں ٹانگ رہی ہیں۔
بیرسٹر ڈاکٹر سیف کا کہنا تھا کہ وزیراعلیٰ خیبر پختونخوا کو محصور کرنا جعلی حکومت کی شکست فاش ہے، کے پی ہاؤس کا محاصرہ احتجاج کی کامیابی کا ثبوت ہے، خواجہ آصف، عطا تارڑ، شرجیل میمن اور دیگر وزرا کی چیخیں نکل رہی ہیں،
انھوں نے کہا کہ حواس باختہ حکومت اپنا اقتدار بچانے کیلئے فیڈریشن کو سبوتاژ کرنے پر تلی ہے، پی ٹی آئی کا ہر کارکن لیڈر ہے اور آئین کا علمبردار ہے، پی ٹی آئی کا ہرکارکن اب اس تحریک کا لیڈربن چکا ہے۔
بلیو ایریا سے کے پی ہاؤس روانگی کے وقت وزیراعلیٰ علی امین گنڈاپور کا گفتگو کرتے ہوئے کہنا تھا، ہم پہنچ گئے ہیں اپنا احتجاج ریکارڈ کرادیا ہے، ہم انتشار پھیلانا نہیں چاہتے۔
وزیراعلیٰ کے پی علی امین گنڈاپور نے کہا کہ یہ ہم پر الزام لگاتے ہیں ہم پرامن جماعت نہیں ہیں، ہم نے ثابت کیا ہم پرامن جماعت ہیں۔
علی امین گنڈاپور نے کہا کہ فسطائیت کے باوجود ہم اپنا احتجاج ریکارڈ کرانے کیلئے پہنچ گئے ہیں، اب ہم بانی پی ٹی آئی سے بات کریں گے کہ آگے کا لائحہ عمل کیا ہوگا۔
دریں اثنا چیئرمین پی ٹی آئی بیرسٹر گوہر کا کہنا تھا کہ ہم صرف آزاد عدلیہ کیلئے نکلے تھے، ہمارا کوئی دھرنا یا جلسہ نہیں تھا ایک دن کا احتجاج تھا، ہمارا ایک دن کا احتجاج تھا جس پر بدترین شیلنگ کی گئی۔
