غزہ: اسرائیلی طیاروں کی دیر البلح میں مسجد پر بمباری کے نتیجے میں 24 فلسطینی شہید ہو گئے۔
الجزیرہ کے مطابق غزہ میں صہیونی فوج نے حملے تیز کر دیے، غزہ کے علاقے دیر البلح میں مسجد پر وحشیانہ بمباری کر کے چوبیس فلسطینی شہید کر دیے گئے، جب کہ متعدد زخمی ہوئے۔
مسجد میں بے گھرافراد نے پناہ لے رکھی تھی، اسرائیلی طیاروں نے شمالی علاقوں پر بھی بم برسائے، جس میں 11 افراد شہید ہوئے، بیت لاحیہ میں اسرائیلی فوج نے گھر پر بمباری کی جس میں ایک نومولود سمیت 2 افراد شہید ہوئے۔
اسرائیلی فوج نے بغیر ثبوت دعویٰ کیا ہے کہ دیر البلح میں واقع شہدا الاقصیٰ مسجد کو حماس ’’کمانڈ اینڈ کنٹرول کمپلیکس‘‘ کے طور پر استعمال کر رہی تھی۔ X پر پوسٹ میں اسرائیلی فوج نے یہ بھی دعویٰ کیا کہ مسجد پر بمباری کرنے سے پہلے شہریوں کو نقصان پہنچانے کے امکانات کو کم کرنے کے لیے کئی اقدامات کیے گئے تھے۔
شهداء وجرحى في قصف طائرات الاحتلال مسجدا قرب مدخل مستشفى شهداء الأقصى بدير البلح وسط قطاع غزة #حرب_غزة #فيديو pic.twitter.com/LJHo2T5BwQ
— الجزيرة فلسطين (@AJA_Palestine) October 6, 2024
غزہ میں اکتوبر 2023 سے اب تک اسرائیلی حملوں میں کم از کم 41,825 افراد شہید اور 96,910 زخمی ہو چکے ہیں۔ ادھر دنیا بھر کے شہروں میں ہزاروں کی تعداد میں لوگ سڑکوں پر نکل آئے ہیں، پیرس سے نیویارک اور کیپ ٹاؤن تک لوگوں نے غزہ پر اسرائیل کی بمباری کے خاتمے کا مطالبہ کیا۔
دوسری طرف امریکی سیکریٹری خارجہ اینٹنی بلنکن نے قطر، فرانس اور سعودی ہم منصب سے ٹیلی فون پر بات کی ہے، جس میں سعودی وزیر خارجہ نے خطے میں کشیدگی کم کرنے پر زور دیا، قطری وزیر خارجہ نے کہا کہ جنگ بندی کے لیے کوششیں تیز کرنا ہوگی۔
