لاہور کے علاقے میانوالی مکڑوال کے قریب انٹیلی جنس بیسڈ کارروائی میں فتنہ الخوارج کے سات دہشت گرد ہلاک اور آٹھ فرار ہوگئے، سی ٹی ڈی نے میانوالی کو بڑی تباہی سے بچا لیا۔
ترجمان سی ٹی ڈی کے مطابق دہشت گردوں نے سی ٹی ڈی ٹیم پر فائرنگ کی، دو طرفہ فائرنگ کے تبادلے میں دہشت گرد اپنے ہی ساتھیوں کی فائرنگ سے ہلاک ہوئے۔
دہشت گردوں سے چھ دستی بم، سیفٹی فیوز وائر، سات کلاشنکوف، گولیاں اور بھاری تعداد میں بارودی مواد برآمد ہوا ہے، 8 دہشت گرد اندھیرے کا فائدہ اٹھاتے ہوئے موقع سے فرار ہوگئے۔
فرار ہونے والے دہشت گردوں کی گرفتاری کے لیے سی ٹی ڈی ٹیموں نے مکڑوال قریب ناکہ بندی کرکے سرچ آپریشن شروع کردیا ہے۔
سی ٹی ڈی ذرائع کے مطابق مذکورہ دہشت گرد میانوالی میں بڑے حملے کی منصوبہ بندی کرچکے تھے۔
ترجمان سی ٹی ڈی کا کہنا ہے کہ مقابلے میں ہلاک ہونے والے دہشت گردوں کی شناخت کا عمل جاری ہے۔
یاد رہے کہ گزشتہ ہفتے راولپنڈی میں سیکیورٹی فورسز کی کارروائی میں ہلاک ایک اور افغان دہشت گرد کی شناخت ہوگئی، دہشت گرد کا تعلق افغان صوبے پکتیکا کے علاقے برمل سے ہے۔
شمالی وزیرستان اور رزمک میں فورسز نے آپریشن کرکے آٹھ دہشت گردوں کوجہنم واصل کیا، جس میں سے ہلاک ایک افغان دہشت گردکی شناخت ہوگئی۔
مزید پڑھیں : سیکیورٹی فورسز سے مقابلہ میں ہلاک خارجی افغان دہشت گرد کی شناخت
ذرائع نے بتایا کہ ہلاک دہشت گردوں میں ایک کا تعلق افغان صوبے پکتیکا کے علاقے برمل سے ہے، ہلاک افغان خارجی دہشت گرد کی شناخت جلال ولد نعمت کے نام سے ہوئی۔
