بلاسپور: بھارتی ریاست چھتیس گڑھ کے شہر بلاسپور میں ایک خاتون نے فیس بک پر لائیو آ کر لوگوں کے سامنے اپنی جان لے لی۔
بھارتی میڈیا رپورٹس کے مطابق بلاسپور، سول لائن تھانے کے علاقے میں ایک ریلوے ملازم کی بیوی پریانکا سنگھ نے ایک افسوس ناک واقعے میں فیس بک پر لائیو آ کر پھندا لگا کر خود کشی کر لی۔
پھندا لٹکانے سے پہلے خاتون نے فیس بک پر کچھ لوگوں کے نام بھی پوسٹ کیے، خاتون نے لکھا کہ ان افراد کے ہراساں کرنے اور غنڈہ گردی کی وجہ سے وہ اپنی جان لے رہی ہے۔
پولیس حکام کے مطابق خاتون نے اتوار کو دن کے 12 بجے فیس بک پر لائیو پھندا لگا کر خود کشی کی، پولیس کو اطلاع بھی فیس بک پوسٹ دیکھنے والوں نے کی، جب پولیس اہلکار اس کے گھر پہنچے تو وہ اندر سے بند تھا۔
پولیس اہلکار ابھی گھر میں داخل نہیں ہوئے تھے جب خاتون کا شوہر ریلوے کی ڈیوٹی ختم کر کے گھر پہنچ گیا، شوہر نے دوسری چابی سے دروازہ کھولا تو اندر جا کر معلوم ہوا کہ بیوی کی لاش لٹک رہی تھی۔
پولیس نے معاملے کی تحقیقات شروع کر دی ہے، اہلکاروں کا کہنا تھا کہ جن لوگوں کے نام ہراسانی کے سلسلے میں سامنے آئے ہیں، ان سے پوچھ گچھ کی جائے گی۔
