کراچی: بیرون ملک میں مقیم پاکستانیوں نے ستمبر میں ترسیلات زر کی مد میں 2.8ارب ڈالر بھیجے، گذشتہ سال کی نسبت انتیس فیصد اضافہ ہوا۔
تفصیلات کے مطابق اسٹیٹ بینک آف پاکستان نے ستمبر میں موصول ہونے والی ترسیلات زر کی تفصیلات جاری کردیں۔
جس میں بتایا گیا کہ رواں مالی سال کی پہلی سہ ماہی میں ترسیلات زر 8 ارب 80 کروڑ ڈالر رہیں، جو گزشتہ مالی سال کی پہلی سہ ماہی کے مقابلے میں اڑتیس اعشاریہ آٹھ فیصد زائد ہے۔
اسٹیٹ بینک کا کہنا ہے ستمبرمیں دو ارب چوراسی کروڑ اکانوے لاکھ ڈالرموصول ہوئے جبکہ اگست میں دوارب چورانوے کروڑ اٹھائیس لاکھ کی ترسیلاتِ زر موصول ہوئی تھیں۔
ستمبر 2023 میں دو ارب بیس کروڑ اکیاسی لاکھ ڈالر کی ترسیلات زر موصول ہوئی تھیں، اس طرح ستمبر 2023 کی نسبت ستمبر 2024 میں ترسیلاتِ زرمیں انتیس فیصد اضافہ ہوا۔
ستمبر 2024 میں سب سے زیادہ سعودی عرب سے اڑسٹھ کروڑ تیرہ لاکھ ڈالر ، متحدہ عرب امارات سے چھپن کروڑ تین لاکھ ڈالر، برطانیہ بیالیس کروڑ چھتیس لاکھ ڈالراورامریکا سے ستائیس کروڑ انچاس لاکھ ڈالر کی ترسیلات زرموصول ہوئیں۔
