سکھر کا گورنمنٹ پرائمری بوائز اسکول چھوٹی پٹنی سندھ کے تعلیمی زوال کی واضح مثال بن گیا ہے۔
اے آر وائی نیوز کے مطابق سکھر کی تحصیل روہڑی کے نواحی گاؤں چھوٹی پٹنی میں گورنمنٹ بوائز پرائمری اسکول کی عمارت خستہ حال ہے اور بچے بجلی، پینے کے صاف پانی سے بھی محروم ہیں۔
اس کے علاوہ اسکول میں بیت الخلا کی سہولیات بھی موجود نہیں ہیں۔
پرائمری اسکول کے عملے میں کُل تعداد پانچ میں جن میں تین استاد ایک ہیڈ ماسٹر اور چوکیدار شامل ہیں۔
ہیڈ ماسٹر اور چوکیدار کی حاضری تو روزانہ کی بنیادوں پر لگائی جارہی ہے مگر ان کو اسکول میں کبھی کبھار ہی دیکھا جاتا ہے جبکہ اسکول کی عمارت بھی خستہ حالی کے سبب کسی بھی وقت حادثے کا سبب بن سکتی ہے۔
نمائندہ اے آر وائی نیوز کے اچانک پہنچنے پر دو ہی استاد حاضر نظر آئے جبکہ ہیڈ ماسٹر سمیت ایک ٹیچر غیرحاضر تھے، بچوں اور علاقہ مکینوں کا کہنا ہے کہ اسکول میں کبھی چوکیدار کو دیکھا ہی نہیں اور ہیڈ ماسٹر کا جب دل چاہتا ہے اسکول کا چکر لگالیتے ہیں۔
ذرائع کا یہ بھی بتانا ہے کہ ہیڈ ماسٹر ایک ساتھ کئی شعبوں سے منسلک ہیں، وہ سرکاری اسکول سے وہ تنخواہ تو پوری وصول کررہے ہیں لیکن اسکول آنے سے قاصر ہیں۔
سندھ کا غریب طبقہ اور تعلیم، تعلیمی اداروں کی ابتر صورتحال، تعلیمی نصاب کو دیکھا جائے تو دیگر صوبوں کے مقابلے میں تاحال پیچھے ہیں اس صورتحال پر قابو پانے کے لیے تعلیمی نظام میں تبدیلی ناگزیر ہے۔
