کراچی: گمشدہ افراد کی بازیابی میں عدم پیش رفت کے باعث مایوس شہریوں نے عدالت میں پیش ہونا چھوڑ دیا، یہ بات سندھ ہائیکورٹ میں گم شدہ افراد کی بازیابی سے متعلق درخواستوں کی سماعت کے دوران جج نے کہی۔
تفصیلات کے مطابق سندھ ہائی کورٹ میں آج جمعرات کو گم شدہ افراد کی بازیابی سے متعلق درخواستوں کی سماعت ہوئی، تاہم کیس کی پیروی کے لیے گم شدہ شہریوں کے اہل خانہ عدالت میں پیش نہیں ہوئے۔
جسٹس نعمت اللہ پھلپوٹو نے صورت حال پر ریمارکس دیے کہ عدالت شہریوں کی آخری امید ہے، لیکن گم شدہ افراد کی بازیابی کے لیے پیش رفت نہ ہونے سے شہری مایوس ہو رہے ہیں، اور پیش رفت نہ ہونے کے باعث اب شہری پیش نہیں ہو رہے۔
سرکاری وکیل نے عدالت کو بتایا کہ کراچی کے علاقے فیروز آباد سے گمشدہ نعیم کی بازیابی کے لیے 28 جے آئی ٹی اجلاس ہو چکے ہیں، لیکن جے آئی ٹی اجلاس میں اہل خانہ شریک نہیں ہو رہے، محمد غفور کے اہل خانہ بھی اجلاس میں شریک نہیں ہو رہے۔ جس پر عدالت نے کہا تفتیشی افسران شہریوں کے اہل خانہ کی جے آئی ٹی میں شرکت یقینی بنائیں۔
سرکاری وکیل نے کہا زبیر موسیٰ اور تاج محمد از خود غائب ہیں،
عدالت نے انوسٹگیشن افسر کو ایف آئی اے سے شہریوں کی ٹریول ہسٹری سے متعلق رپورٹ حاصل کرنے کی ہدایت کی، اور قانون نافذ کرنے والے دیگر اداروں سے بھی تازہ رپورٹس آئندہ سماعت تک طلب کر لیں۔ سماعت مکمل ہونے کے بعد عدالت درخواستوں کی مزید سماعت چار ہفتوں کے لیے ملتوی کر دی۔
