اے آر وائی ڈیجیٹل کے رئیلٹی شو تماشہ سیزن تھری کے ونر ملک عقیل کا کہنا ہے کہ دماغی طور پر اب بھی تماشہ گھر میں موجود ہیں۔
اداکار و ماڈل ملک عقیل نے حال ہی میں ایک شو میں شرکت کی اور اس دوران اپنی نجی زندگی اور رئیلٹی شو تماشہ سیزن 3 سے متعلق اپنی رائے اظہار خیال کیا۔
میزبان کے سوال کے جواب میں ملک عقیل نے بتایا کہ میرا تعلق ایبٹ آباد سے ہے لیکن میں بڑا اسلام آباد میں ہوا، کیریئر کا آغاز 2015 میں کیا تھا اور فلم 2016 میں کی تھی جو ریلیز نہیں ہوسکی۔
ان سے سوال کیا گیا کہ آپ پر الزام ہے کہ اپنی فلموں پر خود پیسہ لگاتے ہیں؟
ملک عقیل نے کہا کہ اس بات میں سچائی نہیں اس وقت میرے پاس اتنا پیسہ نہیں تھا لیکن رئیلٹی شو میں شرکت کے بعد آگیا ہے۔
انہوں نے بتایا کہ فلم لاہور میں بن رہی تھی، پروڈکشن ٹیم انڈیا سے آئی تھیں جو مہیش بٹ کے پینل سے تھی اور میرے ساتھ کوریوگرافر ریشما خان تھی۔
اداکار نے بتایا کہ میں نے جو بھی سیکھا ہے وہ آن سیٹ سیکھا ہے، مجھے یاد ہے کہ جب فلم ریلیز نہیں ہوئی تو میں بہت افسردہ تھا لیکن مینٹور نے حوصلہ دیا اور کہا کہ زندگی میں ابھی بہت ساری چیزیں آنی ہیں بس خود پر بھروسہ رکھو۔
ملک عقیل نے بتایا کہ اس کے بعد اے آر وائی کی فلم کی ’شیر دل‘ کی جس میں میرا کردار ’ہری جیت سنگھ‘ کا تھا، اس سے کافی چیزیں سیکھنے کو ملیں۔
انہوں نے کہا کہ ایک ٹی وی کمرشل نیلم منیر کے ساتھ کیا اور اب میری تین مزید فلمیں آرہی ہیں، اس کے علاوہ اسلام آباد میں چھوٹا بزنس بھی کرتا تھا جو میں نے شوبز میں آنے کے لیے کیا تاکہ کچھ رقم حاصل ہوسکے کراچی آنے کے بعد اس بزنس کو ختم کردیا۔
اداکار نے بتایا کہ کراچی آنے سے پہلے سعود قاسمی اور جویریہ سعود سے ملاقات ہوئی تھی، نعمان حبیب سے ملاقات ہوئی ان کو کال کی اور کہا کہ میں تنہا ہوں کہاں ہو، انہوں نے گلوکاری کی محفل میں مجھے بلایا وہاں پر عدنان صدیقی موجود تھے ان سے گفتگو ہوئی تو جانے سے قبل انہوں نے کہا کہ لڑکے سے پوچھو ٹی وی کمرشل کرے گا۔
ملک عقیل نے کہا کہ میں نے کہا کہ بالکل کروں گا، میں نے اپنی ہلکی پھلکی سی وی ان کو بھیجی اور انہوں نے مجھے رئیلٹی شو تماشہ سیزن تھری میں متعارف کروایا۔
انہوں نے تماشہ سیزن تھری میں شرکت کے لیے ساتھ دینے والے دوستوں اور اے آر وائی ڈیجیٹل کا شکریہ بھی ادا کیا۔
