سعودی عرب کے وزارت افرادی قوت کا کہنا ہے کہ حج وعمرے کے لیے عارضی ورک ویزے جاری کرانے کے لیے ادارے کا فعال ہونا انتہائی اہم ہے۔
سعودی خبر رساں ادارے کی رپورٹ کے مطابق اگر یہ ثابت ہو جائے کہ جس ادارے کی کمرشل رجسٹریشن یا لائسنس پرعارضی ویزے جاری کرائے گئے وہ فرضی یا جعلی ہوں یا یہ ثابت ہو جائے کہ سیزن کے دوران ادارے کو بند کردیا گیا اس صورت میں 15 ہزار ریال جرمانہ ادا کرنا ہوگا۔
رپورٹس کے مطابق سیزنل ویزوں اور کارکنوں کے حوالے سے زمینی حقیقت کو جاننے کے لیے مختلف ورزارتوں پر مشتمل نگران ٹیمیں تشکیل دی جائیں گی جو حج وعمرہ سیزن میں ان اداروں کا جائزہ لیں گی جنہیں عارضی ویزے جاری کیے گئے ہوں گے۔
بیرون مملکت سعودی عرب کے سفارتخانوں کی جانب سے ویزوں پر عربی اور انگلش میں ’حج کے لیے کارآمد نہیں‘ تحریر کیا جائے گا، عارضی ویزوں کے حامل افراد کو حج کرنے کی اجازت نہیں دی جائے گی۔
وزارت حج وعمرہ اس طرح کے سیزنل ویزے جنہیں استعمال نہیں کیا گیا ہو گا انہیں یکم ذوالحجہ کو کینسل کردیا جائے گا۔ سیزنل حج وعمرہ کو کسی بھی طرح عارضی یا مستقل ورک ویزے میں تبدیل نہیں کرایا جاسکے گا۔
وزارت کے ضوابط میں کہا گیا ہے کہ عارضی ویزے کی مد میں درخواست گزار ضمانت کے طورپر فی ویزا 2 ہزارریال جمع کرائے گا جو اس بات کی ضمانت ہو گی کہ کارکن کو اس کے حقوق ملے ہیں یا نہیں۔
جو ادارہ یا کمپنی ویزے جاری کرانے کے بعد ان پر کارکنوں کو درآمد نہیں کرتے انہیں چاہئے کہ وہ وقت مقررہ یعنی یکم ذوالحجہ سے قبل ویزوں کو کینسل کرا لیں اس صورت میں وہ فیس واپسی کا مطالبہ کرسکتے ہیں۔
کینسل کرانے کی درخواست نہ دینے کی صورت میں جمع کرائی گئی فیس واپس نہیں ہوگی۔
اگر سیزنل ویزے پر آنے والے کارکن وقت مقررہ پر ملک سے روانہ ہوجاتے ہیں اور ان کی جانب سے کوئی شکایت نہیں ہوتی تو زرضمانت انہیں واپس کردی جائے گی۔
سعودیہ عرب: پاکستانی ملازمین کے لئے خوشخبری!
ضوابط کے مطابق امسال عارضی طورپر جاری ہونے والے ورک ویزوں کی مدت اجرا کے وقت سے ایک برس ہو گی جبکہ ان ویزوں پر آنے والے کارکن 90 دن ملک میں قیام کرسکتے ہیں، تاہم اس کے بعد اس میں مزید 90 دن کی توسیع کرنا ممکن ہوگا۔
