بیروت: اسرائیلی فضائیہ نے جنوبی لبنان میں مرکزی تجارتی بازار کی سڑک پر بمباری کی جس میں 8 شہری زخمی ہوئے، ایک اور واقعے میں یو این امن دستے کے اہلکار پر فائرنگ کی گئی جس سے وہ زخمی ہو گیا ہے۔
الجزیرہ کے مطابق لبنان کی وزارت صحت نے کہا کہ گزشتہ چوبیس گھنٹوں کے دوران ملک کے شمال میں دو علاقوں اور دارالحکومت کے جنوب میں اسرائیلی حملوں میں کم از کم 15 افراد جاں بحق ہو گئے ہیں۔
اسرائیل نے ہفتے کی شام جنوبی لبنان کے ایک بڑے شہر نباتیح میں مرکزی تجارتی بازار کی سڑک پر بمباری کر دی، جس میں کم از کم آٹھ افراد زخمی ہوئے، امدادی کارکن لگنے والی آگ بجھانے کی کوشش اور بچ جانے والوں کی تلاش کر رہے ہیں۔
لبنان میں اقوام متحدہ کی عبوری فورس (UNIFIL) نے بتایا کہ جمعہ کی رات جنوبی لبنان میں نامعلوم حملہ آوروں کی طرف سے گولی چلنے سے اقوام متحدہ کے ایک امن دستے کے کارکن کو زخمی کیا گیا، یہ صرف دو دنوں میں اسرائیل کی سرحد کے قریب اقوام متحدہ کا پانچواں اہلکار تھا جو زخمی ہوا۔
حزب اللہ کا اسرائیلی فوجی اڈے پر جوابی ڈرون حملہ
غزہ کے بعد بین الاقوامی برادری لبنان میں بھی اسرائیلی بمباری روکنے میں ناکام ہو گئی ہے، لبنان کی وزارت صحت کا کہنا ہے کہ ستمبر میں لبنان پر اسرائیل کے حملوں میں اضافے کے بعد سے کم از کم 1,645 افراد جاں بحق ہو چکے ہیں، جب کہ حزب اللہ اور اسرائیلی افواج کے درمیان ایک سال کی لڑائی میں جاں بحق ہونے والوں کی تعداد 2,255 ہو گئی ہے۔
واضح رہے کہ امریکا سمیت 40 ممالک نے اسرائیل سے یو این کے امدادی کارکنان پر حملے روکنے کا مطالبہ کیا ہے۔
