اسلام آباد: وفاقی وزیر خزانہ محمد اورنگزیب کا کہنا ہے کہ ملکی معیشت مثبت سمت میں گامزن ہے، چین کی جانب سے پاکستان میں سی پیک اور توانائی کے منصوبوں میں اربوں ڈالر کی سرمایہ کاری کی گئی ہے۔
اے پی پی اردو کے مطابق چائنا چیمبر آف کامرس کی تقریب سے خطاب کرتے ہوئے وزیر خزانہ محمد اورنگزیب نے کہا کہ چین کی جانب سے پاکستان میں سی پیک سے پہلے بھی مختلف ہائیڈرو پاور پراجیکٹس اور آبی ذخائر کی تعمیر میں کردار ادا کیا گیا، چین کی جانب سے پاکستان میں توانائی کے شعبہ میں بیس ارب ڈالر سے زائد کی سرمایہ کاری کی گئی، سی پیک کے تحت نو ہزار میگا واٹ بجلی کے منصوبے لگائے جارہے ہیں، اس میں کوئلے اور ایچ بی ڈی سی کے منصوبے شامل ہیں، آئی پی پیز میں چینی کمپنیوں کی جانب سے بڑے پیمانے پر سرمایہ کاری کی گئی ہے، قرض اور ایکویٹی کی مد میں تاریخ کی ریکارڈ سرمایہ کاری کی گئی ہے جو قابل تعریف ہے۔
انہوں نے کہا کہ آئی پی پیز کی وجہ سے ہمارے قدرتی وسائل بھی استعمال میں آئے ہیں اور کوئلے سے سستی ترین بجلی بھی حاصل ہو رہی ہے، پراجیکٹ فنانسنگ کی مد میں بھی بڑی سرمایہ کی گئی ہے۔
ان کا کہنا تھا کہ ہم ان منصوبوں کے حوالہ سے اپنی تمام ذمہ داریاں پوری کرنے کے عزم کا اعادہ کرتے ہیں، چین کی جانب سے پاکستان میں ہائیڈل، سولر، ونڈ سمیت دیگر ذرائع سے بجلی پیدا کرنے کیلئے سرمایہ کاری کی گئی ہے، سی پیک کا پہلا مرحلہ انفراسٹرکچر کی تعمیر جبکہ دوسرا مرحلہ موناٹائزیشن کا ہے، وزیر اعظم شہباز شریف کی سربراہی اور آرمی چیف کی معاونت سے سی پیک کے دوسرے مرحلہ کو بھی عملی شکل دی جائے گی۔
وزیر خزانہ نے کہا کہ پاکستان میکرو اکنامک استحکام کی طرف بڑھ رہا ہے جس کی واضح مثال روپے کا مستحکم ہونا، غیر ملکی زرمبادلہ کے ذخائر آئندہ دو ماہ میں گیارہ ارب ڈالر سے تجاوز کرجائیں گے جو ہمارے اڑھائی ماہ کا ”امپورٹ کور” ہے جبکہ عالمی معیار کے مطابق تین ماہ کی برآمدات کے ذخائر ”گڈ کور” میں آتے ہیں۔
’ہم درست سمت میں جا رہے ہیں، شہباز شریف کی قیادت میں ہم نے ہمیشہ یہی موقف اختیار کیا ہے کہ حکومت کا کام کاروبار کرنا نہیں بلکہ پالیسی فریم ورک دینا اور پالیسیوں کا تسلسل برقرار رکھنا ہے۔‘
انہوں نے کہا کہ صدر، وزیراعظم، آرمی چیف چینیوں کی سیکورٹی کے حوالہ سے پرعزم ہیں، وزیر داخلہ اس حوالہ سے انتہائی کوشاں ہیں، تاہم بدقسمتی سے کچھ ایسے واقعات وقوع پذیر ہوئے۔
ان کا کہنا تھا کہ پاکستان میں موجود چینی کمپنیاں اپنی سرمایہ کاری اور ورک فورس میں وسعت اور پاکستان کی شرح نمو میں ترقی کاعندیہ دے رہی ہیں جو خوش آئند ہے، یہ دونوں ممالک کے درمیان طویل المدتی شراکت داری کی عکاس ہے۔
انہوں نے کہا کہ یہ رپورٹ پہلی بار چھاپی گئی ہے جو شفافیت ظاہر کرتی ہے۔ انہوں نے کہا کہ چین کے وزیراعظم کی پاکستان میں موجودگی ہمارے لئے باعث فخر ہے اور ہم ان کی آمد کے متمنی ہیں۔
