اسلام آباد : شنگھائی تعاون تنظیم کا سربراہی اجلاس آج اسلام آبادمیں شروع ہو رہا ہے، رکن ممالک کے وفود کی آمد کا سلسلہ جاری ہے۔
تفصیلات کے مطابق علاقائی تعاون بڑھانےکاعزم لیے شنگھائی تعاون تنظیم کا دوروزہ اجلاس آج سے شروع ہورہاہے، ایس سی او کونسل آف ہیڈزآف سٹیٹ کے اجلاس کی تفصیلات جاری کردی گئی ہے۔
ایس سی او اجلاس میں شرکت کیلئے غیر ملکی وفود آج پاکستان پہنچیں گے، وزیراعظم کی جانب سے غیرملکی وفود کے اعزاز میں عشائیہ دیاجائے گا۔
ایس سی او سمٹ کا باقاعدہ آغاز 16 اکتوبر کو جناح کنونشن سینٹر میں ہوگا، وزیراعظم شہباز شریف بدھ کی صبح کانفرنس ہال میں شرکاء کا استقبال کریں گے جبکہ ایس سی او سربراہی اجلاس کے شرکاء کا گروپ فوٹو ہوگا۔
وزیراعظم شہبازشریف کی زیرصدارت کل ایس سی او سربراہی اجلاس کی با ضابطہ کاروائی کا آغاز ہوگا ، اجلاس کے آغاز پر وزیراعظم ابتدائی خطاب کریں گے۔
شہبازشریف کے ابتدائی خطاب کے بعد سمٹ کی کارروائی شروع ہوگی، جس کے بعد اجلاس سے مختلف رہنما خطاب کریں گے۔
غیر ملکی لیڈرز کے خطاب کے بعد دستاویزات پر دستخط کیے جائیں گے اور وزیراعظم کے اختتامی کلمات سے کانفرنس کے ایجنڈا آئٹمز مکمل ہوں گے۔
کانفرنس اختتام پر نائب وزیراعظم اسحاق ڈار اور ایس سی او سیکرٹری جنرل میڈیاٹاک کریں گے جبکہ وزیراعظم کی جانب سےکانفرنس کے شرکا کےاعزاز میں ظہرانہ بھی دیا جائے گا۔
تنظیم کے رکن ممالک روس، بیلا روس، قازقستان، کرغزستان، تاجکستان اور ازبکستان کے وزرائے اعظم کے علاوہ ایران کے اول نائب صدر اور بھارت کے وزیرخارجہ اپنے ملکوں کی نمائندگی کریں گے، بھارت کے وزیرخارجہ جے شنکر آج پاکستان پہنچیں گے۔
منگولیا کے وزیراعظم مبصرریاست کے طور پر اورترکمانستان کے وزرا کی کابینہ کےنائب چیئرمین اوروزیر خارجہ بھی خصوصی مہمان کی حیثیت سےشریک ہوں گے۔
شنگھائی تعاون تنظیم کے اجلاس میں تجارت اور سرمایہ کاری کے مواقع کو فروغ دینے کے ساتھ ساتھ رکن ممالک کے درمیان معاشی ترقی کی رفتار بڑھانے کی کوشش کی جائے گی تاکہ باہمی افہام و تفہیم اور تعاون کو فروغ دیا جا سکے۔
یہ سربراہی اجلاس پاکستان کو ایک پلیٹ فارم فراہم کرے گا، جس کے ذریعے وہ عالمی سطح پر اپنی حیثیت کو مضبوط کر سکتا ہے اور علاقائی تعاون میں اپنی قیادت کا کردار نمایاں کر سکتا ہے ساتھ ہی مضبوط معاشی روابط اور سرمایہ کاری کے بڑھتے مواقع پاکستان کی معاشی ترقی کے لیے محرک ثابت ہو سکتے ہیں۔
اس اجلاس کی میزبانی خطے میں ثقافتی ہم آہنگی کو فروغ دے گی اور سماجی روابط کو مضبوط کرے گی، شنگھائی تعاون تنظیم کے سربراہ اجلاس کے موقع پرچینی وزیراعظم کا دورہ پاکستان انتہائی اہمیت کا حامل ہے۔
اس کے وزیراعظم شہبازشریف سائیڈ لائن پرعالمی رہنماؤں سےملاقاتیں کریں گے، سائیڈلائنز پر ہونے والی ملاقاتوں میں معیشت، تجارت، ماحولیات اور سماجی و ثقافتی روابط کے شعبوں میں تعاون بڑھانےپربات چیت کی جائے گی۔
خیال رہے کانفرنس سےپہلےوفاقی دارالحکومت اسلام آباد کو دلہن کی طرح سجادیاگیا، شہرکی سڑکیں پاک چین دوستی کے رنگ میں رنگ گئی ہیں، پاکستان اور چین کے پرچم آویزاں کیے گئے ہیں ساتھ ہی چینی قیادت کی تصویر والے ہورڈنگز بھی لگائے گئے ہیں۔
