اسلام آباد : ایس سی او کانفرنس کا آغاز آج سے اسلام آباد میں شروع ہونے جا رہا ہے، ٹریفک پولیس نے شہریوں کی سہولت کے لئے راستوں کی بندش کا پلان جاری کردیا ہے۔
تفصیلات کے مطابق اسلام آباد ٹریفک پولیس نے 15 اور 16 اکتوبر کیلئے ٹریفک پلان جاری کردیا ہے ، شہراقتدارمیں ایس سی او کانفرنس کے موقع پر سکیورٹی کی پیش نظر جڑواں شہروں میں مختلف اوقات میں ٹریفک کی روانی متاثر رہے گی
ٹریفک پولیس نے بتایا کہ جی ٹی روڈ پشاور سے روات جانے والے ٹیکسلا موٹروے، چکری، چک بیلی روڈ سے روات کا راستہ اختیار کرسکیں گے جبکہ جی ٹی روڈ سے پشاور جانے کیلئے روات، چک بیلی روڈ، چکری اور ٹیکسلا موٹروے کا راستہ استعمال کرنے کا مشورہ ہے۔
پولیس کا کہنا تھا کہ جی فائیو، جی سکس اور ایف سکس مارگلہ روڈ سے راولپنڈی جانے کیلئے نائنتھ ایونیو کا روٹ مقرر کیا گیا ہے جبکہ فیصل ایونیو سے زیروپوائنٹ جانے والی ٹریفک نائنتھ ایونیو کی طرف موڑ دی جائے گی۔
اس کے علاوہ بارہ کہو سے راولپنڈی جانے والے افراد رنگ روڈ، بنی گالہ لہترارڑ روڈ استعمال کر سکیں گے جبکہ راولپنڈی سے اسلام آباد آنیوالے افراد صدر، مری روڈ سے نائنتھ ایونیو استعمال کرسکیں گے۔
پلان کے مطابق زیرو پوائنٹ فیصل ایونیو سے کورال چوک تک ایکسپریس وے دونوں طرف بند ہوگی تاہم کرنل شیر خان شہید روڈ سے فیض آباد آنے کیلئے نائنتھ ایونیو سگنل سے اسٹیڈیم روڈ کو کھلا رکھا جائے گا۔
پشاور سے لاہور جانے والی ہیوی ٹریفک براستہ ٹیکسلا موٹروے اور ترنول پھاٹک سے فتح جنگ موٹر وے جا سکتی ہے جبکہ لاہور جی ٹی روڈ سے اسلام آباد اور راولپنڈی جانے والی ہیوی ٹریفک چک بیلی روڈ سے چکری موٹر وے استعمال کرسکے گی۔
