جنوبی غزہ میں حماس کے عسکری ونگ القسام بریگیڈ کی جانب سے اسرائیلی فوج کی ایک میکانائزڈ انفنٹری کمپنی کو نشانہ بنانے کا دعویٰ سامنے آرہا ہے۔
بین الاقوامی خبر رساں ادارے کی رپورٹ کے مطابق حماس کے عسکری ونگ القسام بریگیڈ کے حملے میں ہلاک اور زخمی اسرائیلی فوجیوں کو ہیلی کاپٹر کے ذریعے لے جایا گیا۔
بیان میں کہا گیا ہے کہ شمالی غزہ میں ایک صہیونی بکتر بندگاڑی کو راکٹ فائر کر کے تباہ کردیا گیا، بکتر بند گاڑی پر حملے میں متعدد اسرائیلی فوجی ہلاک اور زخمی ہوئے۔
اسرائیلی فوج کا اس حوالے سے کہنا ہے کہ کمانڈو سارجنٹ کورین بیٹن جنوبی غزہ میں حماس سے جھڑپ میں ہلاک ہوا۔
دوسری جانب گزشتہ روز حزب اللہ کی جانب سے اسرائیلی فوج کے تربیتی مرکز پر کیے گئے ڈرون حملوں نے تباہی مچا دی۔
حزب اللہ نے بیان میں کہا کہ اس نے حیفہ کے جنوب میں بنیامینہ میں گولانی بریگیڈ کے ایک کیمپ پر خود کش ڈرونز سے حملے کیے ہیں۔
بیان میں کہا گیا کہ یہ حملہ غزہ کی پٹی میں ہمارے ثابت قدم فلسطینی عوام کی حمایت اور ان کی بہادر اور باوقار مزاحمت کی حمایت اور لبنان اور اس کے عوام کے دفاع میں کیا گیا ہے۔
بنیامینہ تل ابیب اور حیفہ کے درمیان واقع ہے اور اس کی آبادی تقریباً 16,000 افراد پر مشتمل ہے۔
اسرائیلی آرمی ریڈیو کا کہنا ہے کہ ڈرون حملے میں تین افراد مارے گئے جب کہ دیگر میڈیا رپورٹس میں زخمیوں کی تعداد 67 بتائی جارہی ہے۔
ایران میں اسرائیل کا ہدف کیا ہوگا؟ امریکی اخبار کا بڑا دعویٰ
اسرائیلی آرمی ریڈیو نے ایک ذریعے کے حوالے سے بتایا کہ حزب اللہ نے فضائی دفاعی نظام کو دھوکا دینے میں کامیابی حاصل کی اور ڈرون کو ڈھانپنے کے لیے میزائلوں کا ایک بیراج فائر کیا۔
