غزہ: صہیونی فورسز کے ہاتھوں جبالیہ پناہ گزین کیمپ میں پھنسے رہائشیوں کا ’’قتل عام‘‘ جاری ہے۔
غزہ میں الجزیرہ کے نمائندے کا کہنا ہے کہ شمالی غزہ کا محاصرہ 12 ویں دن میں داخل ہو رہا ہے، اور جبالیہ پناہ گزین کیمپ میں پھنسے رہائشیوں کا قتل عام جاری ہے، اسرائیلی فورسز نے یہاں ’’منظم تباہی‘‘ مچائی ہے۔
منگل کو غزہ میں اسرائیلی حملوں میں کم از کم 61 افراد شہید ہوئے ہیں، جن میں علاقے کے جنوب میں ابو تمیہ خاندان کے 10 افراد بھی شامل تھے۔
حزب اللہ کے رہنما نعیم قاسم نے ایک ٹیلی ویژن تقریر میں اسرائیل سے کہا ہے کہ شمالی اسرائیل میں آباد کاروں کی واپسی کا حل لبنان اور غزہ میں جنگ بندی ہے۔
ادھر الاقصیٰ اسپتال کے میدان میں بے گھر فلسطینیوں کے خیموں پر وحشیانہ بمباری کے بعد غزہ میں اپنے تیسرے طبی مشن پر برطانیہ کے ڈاکٹر محمد طاہر نے دنیا سے جنگ کے خاتمے کے لیے مزید کام کرنے کا مطالبہ کیا ہے۔
یو این ادارے UNRWA کا کہنا ہے کہ تین فلسطینی پناہ گزین کیمپوں سمیت جنوبی لبنان میں انسانی ہمدردی کی بنیاد پر رسائی ’’شدید محدود‘‘ ہو گئی ہے۔ واضح رہے کہ غزہ میں اکتوبر 2023 سے اب تک اسرائیلی حملوں میں کم از کم 42,344 فلسطینی شہید اور 99,013 زخمی ہو چکے ہیں۔
