کراچی: چیئرمین ایف بی آر راشد محمود لنگڑیال نے واضح پیغام میں کہا کہ ٹیکس چوری کرنے والے اب نہیں بچیں گے، ایسے کاروبار جس کی سالانہ فروخت 2 کروڑ ہوگی اس پر ایکشن ہوگا۔
تفصیلات کے مطابق چیئرمین ایف بی آر راشد محمود لنگڑیال نے فیڈریشن ہاؤس میں خطاب کرتے ہوئے کہا کہ معاشی اعداد و شمار میں بہتری ہوئی ہے ، دو تین سال کے مشکل ترین حالات کے بعد معاشی بہتری ہوئی، معیشت کی بہتری میں تاجر برادری کی محنت شامل ہے۔
راشد محمود لنگڑیال نے بتایا کہ مہنگائی کی شرح کم ہونے پر پالیسی ریٹ کم ہونا شروع ہوئی ، معاشی ماہرین بھی کہہ رہے ہیں شرح سودمیں 2 فیصد تک کمی ہوگی ، شرح سود میں کمی سے بہت مدد ملی۔
ان کا کہنا تھا کہ ٹیکس کا جو ریٹ لگایا ہوا ہے وہ ٹھیک نہیں ، کم کرنا ہوگا، کارپوریٹ ٹیکس ریٹ 25 فیصد سے زائد نہیں ہونا چاہیے، 95 فیصد لوگ غریب ہیں لیکن سیلزٹیکس مدمیں کافی ٹیکس اداکرتے ہیں۔
چیئرمین ایف بی آر نے کہا کہ ملک میں پیسہ 5 فیصد کے پاس ہے اس لیے انہی پر ٹیکس عائد کیا جاتا ہے، 5 فیصد امیر لوگوں میں سے بھی متعدد ٹیکس نہیں دیتے، پاکستان میں 90 فیصد لوگ ٹیکس نہیں دیتے۔
انھوں نے بتایا کہ 4 کروڑ 30 لاکھ گھروں میں سے 40 لاکھ گھروں میں اے سی لگے ہوئے ہیں، 95 فیصد عوام غریب ہے جو سخت گرمی میں اے سی نہیں لگا سکتے۔
راشد محمود لنگڑیال نے ایک آفیسر کوٹریڈ باڈیز کے مسائل کےحل کیلئے مقرر کرنے کی ہدایت کرتے ہوئے کہا کہ پورٹ پر اسیسمنٹ اور ایگزمینیشن کا نیا سسٹم لارہے ہیں ، کمپنیوں کے سیلز ٹیکس میں فراڈ بھی پکڑے گئے ہیں۔
چیئرمین فیڈرل بورڈ آف ریونیو نے واضح پیغام دیا کہ ٹیکس چوری کرنے والے اب نہیں بچیں گے، ایسے سرکاری افسر، تاجر اور صنعتکار بھی ہیں، جو ایک روپے کی ٹیکس چوری نہیں کرتے، ایسے کاروبار جس کی سالانہ فروخت 2 کروڑ ہوگی اس پر ایکشن ہوگا۔
