روزگار کیلیے سعودی عرب جانے والے پاکستانیوں سمیت تمام غیر ملکیوں کیلئے اپنے اقامے کی تجدید مقررہ ایام میں کرانا ضروری ہے بصورت دیگر اس پر جرمانے کی رقم دُگنی وصول کی جائے گی۔
اس حوالے سے سعودی محکمہ پاسپورٹ نے کہا ہے کہ اقامہ کی میعاد ختم ہونے پر جلد از جلد تجدید کروائی جائے کیونکہ غلط اقامہ آپ کو پریشانی میں ڈال سکتا ہے۔
سعودی حکام کے مطابق غیر ملکی شہریوں کو اپنے اقامہ کی میعاد ختم ہونے کے تین دن کے اندر اس کی تجدید کروانا لازمی ہے۔
جرمانے کی تفصیل:
اگر غیر ملکی کارکنان تین دن کے اندر اپنے اقامے کی تجدید نہیں کرواتے تو ان پر جرمانہ عائد کیا جائے گا، حکام کے مطابق پہلی بار اقامے کی تجدید میں تاخیر پر 500 سعودی ریال جبکہ دوسری بار تاخیر کی صورت میں یہ جرمانہ بڑھ کر 1000 سعودی ریال ہو جائے گا۔
یاد رہے کہ بیورو آف امیگریشن اینڈ اوورسیز ایمپلائمنٹ پاکستان کے اعداد و شمار کے مطابق سعودی عرب کا شمار ان ممالک میں جہاں پاکستانیوں کی بڑی تعداد روزگار کے حصول کیلئے قیام پذیر ہے۔ رپورٹ کے مطابق سعودی عرب میں تقریباً 2.6 ملین پاکستانی ملازمت کر رہے ہیں۔
علاوہ ازیں سعودی عرب میں کام کرنے کے خواہشمند افراد کے لیے اچھی خبر یہ ہے کہ مملکت میں عارضی ورک ویزوں کے لیے اہم سہولت کا اعلان کیا گیا ہے۔
سعودی وزارت حج و عمرہ نے حج اور عمرہ کی خدمات کے لیے عارضی ورک ویزا یا سیزن ورک ویزا کے حوالے سے اہم اپ ڈیٹس کی ہیں۔
اس سے قبل عارضی ورک ویزا کسی فرد کو مملکت میں 90 دن تک رہنے کی اجازت دیتا تھا لیکن ضوابط میں تازہ تبدیلی سے سیزن ویزا رکھنے والوں کو اپنے قیام میں مزید 90 دن کی توسیع مل جائے گی۔
