واشنگٹن: اسرائیل کو غزہ میں امداد کی رسائی کی صورت حال بہتر نہ بنانے کے نتیجے میں ہتھیاروں کی پابندی کی دھمکی کا بھانڈا بائیڈن انتظامیہ کے اہلکار نے پھوڑ دیا ہے۔
امریکی آؤٹ لیٹ پولیٹیکو کی ایک رپورٹ کے مطابق بائیڈن انتظامیہ کے مشرق وسطیٰ کے امدادی ایلچی نے انسانی ہمدردی کے گروپوں کو بتایا کہ امریکا غزہ میں داخل ہونے والی امداد پر پابندیوں کے باوجود اسرائیل پر ہتھیاروں کی پابندی عائد کرنے پر غور نہیں کرے گا۔
الجزیرہ کے مطابق ذرائع نے اس حوالے سے اپنی شناخت اس لیے ظاہر نہیں کی ہے کیوں کہ اس سے غزہ میں ان کے امدادی کاموں میں رکاوٹ پیدا ہو سکتی ہے، انھوں نے کہا کہ مشرق وسطیٰ کے انسانی مسائل کے لیے بائیڈن کی خصوصی ایلچی لیز گرانڈے نے اگست میں واشنگٹن میں انسانی ہمدردی کے گروپوں سے ملاقات کی تھی۔
اس ملاقات میں گرانڈے نے انھیں بتایا کہ اسرائیل ایک ایسے سرکل کا حصہ ہے جو بہت کم اتحادیوں پر مشتمل ہے، اس لیے واشنگٹن اسے امداد سے انکار نہیں کرے گا۔
اسرائیلی لابی نے بائیڈن انتظامیہ کی ڈیڈ لائن مسترد کر دی
یاد رہے کہ 13 اکتوبر کو بائیڈن انتظامیہ کے سینئر حکام نے اسرائیلی وزیر دفاع یوو گیلنٹ کو ایک خط بھیجا تھا، جس میں خبردار کیا گیا تھا کہ اگر واشنگٹن نے 30 دنوں کے اندر غزہ کے انسانی بحران سے نمٹنے کے لیے اہم اقدامات نہیں کیے، تو اسرائیل کو ہتھیاروں کی فراہمی خطرے میں پڑ جائے گی۔
