ہوانا: کیریبین ملک کیوبا میں تاریکی کا راج پھیل گیا ہے، امریکی پابندیوں کے باعث ملک میں توانائی کا بحران سنگین تر ہو گیا ہے۔
غیر ملکی میڈیا رپورٹس کے مطابق کیوبا میں توانائی کا بحران سنگین ہو گیا ہے، اور آدھا ملک تاریکی میں ڈوب گیا، لاکھوں افراد بجلی سے محروم ہیں۔
حکومت نے تین دن کے لیے سرکاری اسکول، کاروباری مراکز اور تمام غیر ضروری سرگرمیوں کو بند رکھنے کا اعلان کر دیا ہے، حکومت کا کہنا ہے کہ توانائی کے بحران کا سامنا ہے جس کی بڑی وجہ ایندھن کی قلت ہے۔
کیوبا کے صدر میگوئل ڈیاز کینیل نے توانائی کے بحران کا ذمہ دار امریکی پابندیوں کو قرار دے دیا ہے، اور کہا ہے کہ پابندیوں کے باعث ایندھن کی خریداری میں مشکلات ہیں۔
واضح رہے کہ کیوبا کے دارلحکومت ہوانا سمیت بیش تر شہروں میں 18 گھنٹے کی لوڈشیڈنگ معمول ہو گئی ہے۔ روئٹرز کے مطابق ملک کے ایک کروڑ باشندوں کی اکثریت جمعہ کی رات کو بھی اندھیرے میں تھی، تاہم حکام کا کہنا تھا کہ تیل سے چلنے والے کم از کم پانچ پیداواری پلانٹس راتوں رات دوبارہ شروع ہو جائیں گے۔
