کوریو گرافر اور ہدایت کار ریمو ڈی سوزا اور ان کی اہلیہ لیزیل ڈی سوزا کے خلاف ساڑھے 11 کروڑ روپے کے فراڈ کا مقدمہ درج کرلیا گیا۔
مہاراشٹر میں ایک ڈانس گروپ نے کوریوگرافر ریمو ڈی سوزا اور انکی اہلیہ کے خلاف 11.96 کروڑ روپے کی دھوکہ دہی کے الزام میں مقدمہ درج کروایا ہے، پولیس نے بتایا کہ ہفتہ کو پانچ دیگر لوگوں کے خلاف بھی مقدمہ درج کیا گیا۔
ایک پولیس اہلکار نے بتایا کہ 26 سالہ ڈانسر کی شکایت پر درج کیا گیا، میرا روڈ پولیس اسٹیشن میں 16 اکتوبر کو ریمو، لیزیل اور پانچ دیگر کے خلاف دفعہ 465 (جعل سازی)، 420 (دھوکہ دہی) اور تعزیرات ہند کی دیگر متعلقہ دفعات کے تحت مقدمہ درج کیا گیا۔
ایف آئی آر کے مطابق شکایت کنندہ اور اس کے گروپ کے ساتھ 2018 سے جولائی 2024 کے درمیان مبینہ طور پر دھوکہ دہی کی گئی تھی۔
مقدمے میں کہا گیا کہ ڈانس گروپ نے ایک ٹیلی ویژن شو میں پرفارم کیا اور فتح حاصل کی جبکہ ملزم نے مبینہ طور پر ایسا ظاہر کیا جیسے یہ گروپ ان کا ہے اور 11.96 کروڑ روپے کی انعامی رقم ہتھیا لی۔
اس معاملے کے دیگر ملزمان میں اوم پرکاش شنکر چوہان، روہت جادھو، فریم پروڈکشن کمپنی، ونود راؤت، ایک پولیس اہلکار اور رمیش گپتا شامل ہیں، پولیس نے بتایا کہ معاملے کی مزید تحقیقات کی جارہی ہیں۔
