اسلام آباد : پاکستان تحریک انصاف (پی ٹی آئی) کی سیاسی کمیٹی نے دونوں ایوانوں میں آئینی ترمیم کیلئے ووٹنگ کے مکمل بائیکاٹ کا اعلان کردیا۔
اے آر وائی نیوز کی رپورٹ کے مطابق پاکستان تحریک انصاف کی سیاسی کمیٹی نے خصوصی اجلاس کا اعلامیہ جاری کردیا ہے۔
پی ٹی آئی اعلامیے کے مطابق پی ٹی آئی کی سیاسی کمیٹی نے دونوں ایوانوں میں آئینی ترمیم کیلئے ووٹنگ کے عمل کا مکمل بائیکاٹ کا اعلان کردیا۔
سیاسی کمیٹی کا کہنا ہے کہ رائے شماری میں حصہ لینے والے پی ٹی آئی ارکان قومی اسمبلی اور سینٹ کیخلاف احتجاج کا فیصلہ کیا گیا ہے۔
پی ٹی آئی کے اعلامیہ میں کہا گیا ہے کہ عوامی مینڈیٹ پر قابض گروہ آئین کو بدلنے کا اخلاقی، جمہوری اور آئینی جواز نہیں رکھتا۔
تحریک انصاف کے ٹکٹ پر منتخب ہونے والے اراکین سینیٹ اور اراکین قومی اسمبلی پارٹی پالیسی اور بانی پی ٹی آئی کی ہدایت کے پابند ہیں۔ پارٹی پالیسی سے روگردانی کرنے والوں کی رہائش گاہوں کے باہر پر امن احتجاجی دھرنے دیں گے۔
واضح رہے کہ قبل ازیں جمعیت علمائے اسلام ف کے سربراہ مولانا فضل الرحمان نے کہا ہے کہ آئینی ترمیم کامعاملہ کل تک مؤخر کردیا گیا ہے، پاکستان تحریک انصاف نے وقت مانگا ہے، پی ٹی آئی کا جواب موصول ہونے کے بعد قوم کو فیصلے سے آگاہ کریں گے۔
اسلام آباد میں بلاول بھٹو کے ہمراہ صحافیوں سے گفتگو کرتے ہوئے مولانا فضل الرحمان نے کہا کہ گزشتہ روز ہم نے اور پی پی نے آئینی ترمیم پراتفاق رائے حاصل کیا تھا جس کے بعد لاہور میں ن لیگ کی قیادت کے ساتھ بھی اس پر مزید مشاورت ہوئی اور ہم نے جن نکات پر اعتراض کیا حکومت اس سے دستبردار ہونے پر راضی ہوئی۔؎
