کینبرا: برطانوی بادشاہ کنگ چارلس سوم ان دنوں آسٹریلیا کے دورے پر ہیں، تاہم گزشتہ روز انھیں اس وقت سخت شرمندگی کا سامنا کرنا پڑا جب ایک تقریب میں ایک خاتون سینیٹر نے انھیں کھری کھری سنا دی۔ خاتون نے گالیاں بھی دیں جنھیں ویڈیو میں سنسر کیا گیا ہے۔
بی بی سی نے لکھا کہ کنگ چارلس نے سرکاری دورے کے دوسرے دن آسٹریلیا کے پارلیمنٹ ہاؤس میں اپنی خطاب ختم کر چکے تھے، جب اچانک ایک آزاد سینیٹر کی طرف سے انھیں ’’تم میرے بادشاہ نہیں ہو‘‘ کے نعروں کا سامنا کرنا پڑا۔
لیڈیا تھورپ نامی خاتون سینیٹر نے دارالحکومت کینبرا میں تقریباً ایک منٹ تک چیخ چیخ کر تقریب میں خلل ڈالا، یہاں تک کہ انھیں سیکیورٹی اہلکار باہر نکال کر لے گئے۔
خاتون نے کہا ’’تم ہمارے بادشاہ نہیں ہو، اورنہ ہی ہماری خودمختاری کے مالک ہو، تم ہمارے لوگوں کی نسل کشی کے مرتکب ہوئے ہو‘‘ دبنگ خاتون نے شاہ چارلس کو مخاطب کرتے ہوئے کہا تم ہماری خودمختاری کے مالک نہیں ہو ہمیں ہماری سرزمین واپس کرو۔
جب سیکیورٹی اہلکارخاتون کو تقریب سے باہر لے جا رہے تھے تو وہاں موجود لوگ حیران و پریشان ادھر اُدھر دیکھتے رہے۔ وائرل ہونے والی ویڈیو میں سنا جا سکتا ہے کہ خاتون نے نکلتے نکلتے بھی نوآبادکاری کو گالیاں دیں لیکن ویڈیو میں انھیں سنسر کیا گیا۔
