اسلام آباد ہائی کورٹ نے بانی پی ٹی آئی کی ذاتی معالجین سے طبی معائنے کے لئے دائر درخواست کل سماعت کے لیے مقرر کر دی۔
جسٹس میاں گل حسن اورنگزیب کل بانی پی ٹی آئی کی درخواست پر سماعت کریں گے۔ بانی پی ٹی آئی نے بیرسٹر سلمان صفدر اور خالد یوسف چوہدری کے ذریعے اسلام آباد ہائیکورٹ سے رجوع کر رکھا ہے۔ بانی پی ٹی آئی کے ذاتی معالجین کو رسائی نہیں دی جا رہی۔
درخواست کے مطابق بانی پی ٹی آئی سابق کھلاڑی اور 72 سال عمر ہے اور سابق وزیراعظم ہیں، ڈاکٹر عاصم کو 15 اکتوبر کو بانی پی ٹی آئی تک رسائی نہیں دی گئی ذاتی معالجین بانی پی ٹی آئی کی میڈیکل ہسٹری سے آگاہ ہیں۔
درخواست میں استدعا کی گئی ہے کہ ڈاکٹر عاصم یوسف ، ڈاکٹر فیصل سلطان ڈاکٹر ثمینہ نیازی کو پندرہ روزہ شیڈول کے مطابق چیک اپ کا اجازت نامہ جاری کیا جائے، ڈاکٹر عاصم یوسف ڈاکٹر ثمینہ نیازی اور ایک ای این ٹی ڈاکٹر کو فی الفور معائنہ کے لئے اجازت دی جائے۔
درخواست میں چیف کمشنر اسلام آباد اور سپریٹنڈنٹ اڈیالہ جیل کو فریق بنایا گیا ہے۔