کراچی : شہر قائد میں کاٹن سوسائٹی کی لوڈشیڈنگ ختم کرنے کیلئے کروڑوں روپے رشوت طلب کئے جانے کا انکشاف سامنے آیا۔
تفصیلات کے مطابق سندھ ہائیکورٹ میں کاٹن سوسائٹی اسکیم 33 گلشن اقبال میں غیر اعلانیہ لوڈشیڈنگ سے متعلق سماعت ہوئی۔
منصف جان ایڈووکیٹ نے بتایا کہ کاٹن سوسائٹی کےمکین سو فیصد بجلی کابل اداکرتےہیں لیکن کے الیکٹرک نے سوسائٹی کو لائن لاسز والے علاقےمیں شامل کرلیا۔
درخواست گزار کا کہنا تھا کہ سوسائٹی میں گوٹھوں کی طرح روزانہ 14،15 گھنٹےلوڈشیڈنگ کی جارہی ہے اور لوڈشیڈنگ ختم کرنے کیلئے 2 کروڑ روپے رشوت طلب کیے جارہے ہیں۔
درخواست گزار نے استدعا کی کے الیکٹرک کو سو فیصد بل ادا کرنے والے علاقوں میں لوڈشیڈنگ ختم کرنے کا حکم دیا جائے۔
سندھ ہائیکورٹ نے ایم ڈی کے الیکٹرک اور دیگر فریقین کو نوٹس جاری کرتے ہوئے فریقین سے دو ہفتوں میں تفصیلی جواب طلب کرلیا۔
