نیشنل سیونگز نے حال ہی میں پچھلے ماہ ستمبر میں بچت اکاؤنٹ سمیت مختلف مصنوعات پر دیے جانے والے منافع کی شرح پر نظر ثانی کی ہے۔
اس سے قبل نیشنل سیونگز پر سرمایہ کاروں کو 19 فیصد کا منافع دیا جارہا تھا تاہم اب اس منافع کی شرح کو کم کرکے 16 فیصد کردیا گیا ہے، سیونگ اکاؤنٹ میں سرمایہ کاری کرنے والوں کو منافع ہر سال 30 جون کو دیا جاتا ہے۔
یہ بات بھی قابل ذکر ہے کہ ایکٹو ٹیکس پیئر لسٹ (اے ٹی ایل) میں شامل افراد اپنی سرمایہ کاری کی تاریخ اور رقم/ پرافٹ سے قطع نظر منافع پر15 فیصد ودہولڈنگ ٹیکس ادا کریں گے۔
بینک کا یہ بھی کہنا ہے کہ ایکٹو ٹیکس پیئر لسٹ میں ظاہر نہ ہونے والے افراد پر ودہولڈنگ ٹیکس کی شرح سرمایہ کاری اور رقم/ پرافٹ کی تاریخ سے قطع نظر منافع کا 35 فیصد ہوگی جبکہ زکوٰۃ بھی قواعد کے مطابق لاگو ہوگی۔
خیال رہے کہ قومی بچت مرکز یا قومی بچت بینک چھوٹے سرمایہ کاروں کو اس طریقے سے سرمایہ کاری کرنے کی ترغیب دینے کے لیے سیونگ اکاؤنٹ پیش کرتا ہے جس سے ان کی روزمرہ کی مالی ضروریات کو پورا کرنے میں مدد مل سکتی ہے۔
بچت اکاؤنٹ، قومی بچت کا سب سے پرانا اور اعلیٰ ترین پروڈکٹ ہے، جو کہ اپنے سرمایہ کار کو ہفتے میں تین بار جمع کی گئی رقم نکالنے کے لیے ایک بہترین سہولت فراہم کرتا ہے۔
کوئی بھی پاکستانی شہری یا بیرون ملک مقیم پاکستانی اپنا بچت اکاؤنٹ ایک بالغ کے طور پر یا دو بالغ افراد مشترکہ طور پر اکاؤنٹ کھول سکتے ہیں۔
بچت اکاؤنٹ میں سرمایہ کاری کی کم از کم حد 100 روپے ہے جبکہ زیادہ سے زیادہ سرمایہ کاری کی کوئی حد نہیں ہے، نیشنل سیونگز کے دفتر میں ایک اکاؤنٹ ایک شخص ہی کھول سکتا ہے۔
