راولپنڈی : بانی پی ٹی آئی کی اہلیہ بشریٰ بی بی کی آج اڈیالہ جیل سے رہائی کا امکان ہے ، وہ کسی اور کیس میں مطلوب یا گرفتار نہیں۔
تفصیلات کے مطابق اسلام آباد ہائیکورٹ سے توشہ خانہ ٹو کیس میں بانی پی ٹی آئی کی اہلیہ بشریٰ بی بی کی ضمانت منظوری کے معاملے پر ضمانتی مچلکے جمع ہونے پر ان کی اڈیالہ جیل سے آج رہائی کا امکان ہے۔
،ذرائع کا کہنا ہے کہ عمران خان کی اہلیہ کسی اور کیس میں مطلوب یا گرفتار نہیں، ان کے وکلانے ضمانتی مچلکے جمع کرانے کیلئے متعلقہ عدالت سے رجوع کرلیا ہے۔
ضمانتی مچلکے جمع ہونے اور روبکار جاری ہونے بعد ان کو رہا کیا جائے گا، عدالتی عملے کا بانی پی ٹی آئی کی اہلیہ کی رہائی کے روبکار لیکر آج ہی اڈیالہ جیل پہنچنے کا امکان ہے۔
مزید پڑھیں : توشہ خانہ ٹو کیس : بشریٰ بی بی کو رہا کرنے کا حکم
یاد رہے اسلام آباد ہائی کورٹ نے توشہ خانہ ٹو کیس میں بانی پی ٹی آئی کی اہلیہ کی ضمانت منظور کرتے ہوئے رہائی کا حکم دیا تھا۔
اسلام آبادہائیکورٹ کے جسٹس گل حسن اورنگزیب نے تحریری فیصلہ جاری کیا، جس میں کہا کہ بانی پی ٹی آئی کی اہلیہ کی ضمانت منظور کی جاتی ہے۔
اسلام آبادہائیکورٹ نے 10،10لاکھ روپے کے 2ضمانتی مچلکےجمع کرانے کا حکم دیتے ہوئے کہا کہ درخواست ضمانت کا تفصیلی فیصلہ بعدمیں جاری ہوگا۔
