روس کا اعلیٰ سطح وفد نیتن یاہو سے ملاقات کیلئے اسرائیل پہنچ گیا ہے، امکان ظاہر کیا جارہا ہے کہ روسی وفد آج اسرائیلی وزیراعظم نیتن یاہو سے ملاقات کرے گا۔
بین الاقوامی خبر رساں ادارے کی رپورٹ کے مطابق روس کے اعلیٰ سطح وفد کی اسرائیلی قومی سلامتی کے مشیر سے بھی ملاقات کا امکان ظاہر کیا جارہا ہے۔
ایک اور اہم پیش رفت میں حماس کا وفد ماسکو پہنچ گیا ہے، جو روسی نائب وزیرخارجہ سے ملاقات کرے گا۔
واضح رہے کہ روس کے صدر ولادیمیر پیوٹن نے مشرق وسطیٰ میں تنازعات کے خاتمے میں مدد کی پیشکش کر دی ہے۔
روسی صدر ولادیمیر پیوٹن نے قازان میں برکس پلس سربراہی اجلاس اور دوستوں کے پہلے مکمل اجلاس سے پہلے اپنے خطاب میں کہا کہ مشرق وسطیٰ کا بحران تاریخ کا سب سے خونی بحران بن گیا ہے۔
انہوں نے کہا کہ مشرق وسطیٰ کے بحران سے تشویش پیدا ہوتی ہے، غزہ میں جنگی کارروائیاں لبنان تک پھیل گئی ہیں، خطے کے کئی ممالک متاثر ہوئے ہیں، اسرائیل اور ایران کے درمیان بڑھتی ہوئی کشیدگی خطے کو مکمل جنگ کے دہانے پر کھڑا کر رہی ہے۔
روسی صدر کا کہنا تھا کہ روس مشرق وسطیٰ میں ہونے والے واقعات پر فکر مند ہے اور اس کا خیال ہے کہ وہاں تنازعات کے حل کے لئے حالات پیدا کرنے میں اس کا کردار ہے۔
اسرائیلی سفارت خانے پر دھاوا، توڑ پھوڑ
پیوٹن نے مزید کہا کہ ماسکو نہیں چاہتا کہ تنازع پھیلے، ہم سمجھتے ہیں کہ خطے کا کوئی بھی ملک مکمل جنگ نہیں چاہتا، مشرق وسطیٰ مکمل جنگ کے دہانے پر ہے، انہوں نے تشدد کے خاتمے کا مطالبہ کیا۔
