کراچی کے علاقے مواچھ گوٹھ میں بچہ کھیلتے ہوئے مین ہول میں گر گیا۔
اے آر وائی نیوز کے مطابق کراچی کے علاقے ماڑی پور ٹاؤن یوسی 4 کے علاقے مواچھ گوٹھ غفوری چوک کے قریب گلی میں کھیلتے ہوئے بچہ کھیلتے ہوئے مین ہول میں گر گیا۔
علاقہ مکین بچے کو تلاش کرتے رہے کچھ دیر بعد عوام نے اپنی مدد آپ کے تحت باحفاظت مین ہول سے نکال لیا۔
علاقہ مکینوں میں واقعے پر غم و غصہ پایا جاتا ہے اور ان کا کہنا ہے کہ علاقے میں جگہ جگہ گٹر کے ڈھکن غائب ہیں جس کی وجہ سے اس قسم کے واقعات ہونا معمول بن گیا ہے۔
مواچھ گوٹھ کے مکینوں کا کہنا ہے کہ بلدیاتی نمائندے اپنی ذمہ داری کا احساس کرتے ہوئے کھلے مین ہول کے ڈھکن لگائیں۔
واضح رہے کہ گزشتہ سال کراچی میں ڈپٹی میئرسلمان عبداللہ مراد کی یوسی میں بچہ گٹر میں گرکر جاں بحق ہوگیا تھا، بچےکی لاش نکال لی گئی تھی۔
بچے کے والد غم سے نڈھال تھے، حکام کی لاپروائی پر اہل علاقہ نے احتجاج کیا تھا۔
یاد رہے کہ اس سے قبل کراچی کے علاقے شاہ لطیف ٹاوٴن سے لاپتہ 2 سالہ بچہ گٹر سے زندہ مل گیا تھا، محمد زو خان18 گھنٹے سے زائد گٹر میں زندگی موت کی جنگ لڑتا رہا تھا۔
بچے کے والد کا کہنا تھا کہ عبداللہ نے بتایا 18 گھنٹے قبل اس نے گٹر کے اندر زو خان کو پھینک دیا تھا تاہم عبداللہ نے جان لیوا حرکت کیوں کی پتہ نہ چل سکا تھا۔
18 گھنٹے کے اندر مچھروں اور دیگر کیڑوں نے بچے کا برا حال کر دیا تھا ، والدین نے کم عمر ملزم عبداللہ کو معاف کرتے ہوئے کہا تھا کہ میں قانونی کارروائی نہیں چاہتا ، شاہ لطیف پولیس اور علاقہ مکینوں کا شکرگزار ہو جنہوں نے مدد کی۔
