اسلام آباد: پاکستان تحریک انصاف کے بانی کو جیل میں بہتر سہولتیں فراہم کرنے کیلئے درخواست دائر کردی گئی جس پر کل سماعت ہوگی۔
تفصیلات کے مطابق بانی پی ٹی آئی کی بہن نورین نیازی کی جانب سے وکلا کے ذریعے عدالت میں یہ درخواست دائر کی گئی ہے، اسلام آباد ہائیکورٹ کے جسٹس ارباب محمد طاہر کل درخواست پر سماعت کریں گے۔
بانی پی ٹی آئی کو جیل میں بہتر سہولتیں فراہم کرنے کے حوالے سے درخواست پر رجسٹرار آفس نے کیس سماعت کیلئے مقرر کرنے کی کاز لسٹ جاری کردی ہے۔
دریں اثنا تحریک انصاف کے رہنما بیرسٹرعلی ظفر کا اے آر وائی نیوز سے گفتگو کرتے ہوئے کہنا تھا کہ بانی پی ٹی آئی سے جوڈیشل کمیشن کیلئے مشاورت ہوئی ہے، بانی نے جوڈیشل کمیشن کے لیے 2 نام بتادیے ہیں۔
بیرسٹر علی ظفر نے کہا کہ جوڈیشل کمیشن کے لیے ناموں کا اعلان جلد کردیا جائےگا، ہمارا خدشہ ہے کہ 27ویں آئینی ترمیم لائی جا رہی ہے۔
