واشنگٹن : امریکی ترجمان محکمہ خارجہ میتھیو ملر نے کہا ہے کہ بانی پی ٹی آئی کی حکومت کو ہٹانے میں امریکا کا کوئی کردار نہیں۔
واشنگٹن میں ترجمان امریکی محکمہ خارجہ میتھیو ملر نے پریس کانفرنس کے دوران کیے گئے سوال کے جواب میں کہا کہ بانی پی ٹی آئی کی وزارت عظمیٰ سے برطرفی میں امریکی کردار کے الزامات غلط ہیں۔
میتھو ملر سے سوال کیا گیا تھا کہ لطیف کھوسہ کہتے ہیں کہ ٹرمپ انتخابات جیتے تو بانی پی ٹی آئی رہا ہوجائیں گے اور ڈونلڈ لو بانی پی ٹی آئی کیخلاف سازش میں ملوث تھے،۔
جس کے جواب میں ترجمان امریکی محکمہ خارجہ کا کہنا تھا کہ سابق وزیر اعظم کیخلاف قانونی کارروائیاں پاکستانی عدالتوں کا معاملہ ہے، مقدمات کا فیصلہ پاکستانی عدالتوں نے کرنا ہے، پاکستان کی سیاست پاکستان کے عوام کے لیے ہے۔
امریکی ترجمان میتھیو ملر نے مزید کہا کہ پاکستانی سیاست کا معاملہ پاکستانی عوام کو اپنے قانون اور آئین کے مطابق طے کرنا ہے۔
میتھوملر سے پوچھا گیا کہ کینیڈین حکومت نے الزام لگایا ہے کہ بھارتی وفاقی وزیر امیت شاہ سکھوں کی قاتلانہ سازش میں ملوث ہیں، جس پر ترجمان امریکی محکمہ خارجہ کا جواب تھا کہ کینیڈا کی طرف سے لگائے گئے الزامات تشویشناک ہیں، الزامات پر حکومت سے مشاورت جاری رکھیں گے۔
