اسلام آباد: وزارت مذہبی امور نے پاکستانی عازمین حج کیلیے سعودی عرب کی شرائط کے مطابق صحت پالیسی تیار کر لی۔
وزارت مذہبی امور کی صحت پالیسی کے مطابق ڈائیلاسز کروانے والے افراد کے اس سال حج پر جانے پر پابندی ہوگی جبکہ دل کے مریض اور سانس پھولنے کے مریض بھی حج نہیں کر سکیں گے۔
صحت پالیسی میں کہا گیا کہ پھیپڑوں کی بیماری یا مصنوعی تنفس پر زندہ افراد اور ایسے مریض جن کے جگر فیل ہونے کا خدشہ ہو وہ بھی حج پر نہیں جا سکیں گے، سنگین اعصابی اور نفسیاتی امراض میں مبتلا اشخاص پر بھی پابندی ہوگی۔
پالیسی میں پیٹ میں پانی بھرنے، منہ یا بڑی آنت سے خون آنے کی بیماری کے مریض بھی شامل ہیں جبکہ جسمانی اعضا کو حرکت دینے سے معذور افراد بھی حج پر نہیں جا سکیں گے۔
’کمزور یادداشت یا بھولنے کی بیماری میں مبتلا افراد، 7 ماہ کی حاملہ خاتون، منتقل ہونے والی بیماریوں میں مبتلا مریض، ٹی بی اور کیسنر کے زیرِ علاج مریض بھی حج پر نہیں جا سکتے۔‘
وزارت مذہبی امور نے بتایا کہ انفلوئنزا، ڈینگی اور کورونا کے مریض بھی حج پر نہیں جا سکتے، عازمین کیلیے گردن توڑ بخار، انفلوئنزا، کورونا اور پولیو سرٹیفکیٹ لازمی ہے۔
