ٹوکیو : جاپانی حکومت نے ان سائیکل چلانے والوں کیخلاف سخت کارروائی کا اعلان کیا ہے جو اس دوران موبائل فون کا استعمال کرتے ہیں۔
جاپانی ویب سائٹ کی رپورٹ کے مطابق جاپان میں کیے گئے ترمیم شدہ نئے ٹریفک قوانین کی خلاف ورزی کرنے والے سائیکلسٹ اگر موبائل فون استعمال کرتے ہوئے پائے گئے تو ان کو ایک ہزار ین جرمانے کے ساتھ ساتھ کم از کم 6 ماہ کے لیے جیل بھی جانا پڑے گا۔
مذکورہ قوانین کا اطلاق آج سے ہوگیا ہے، نیشنل پولیس ایجنسی کے جاری کردہ اعلامیے کے مطابق سائیکل چلاتے ہوئے ہاتھ میں اسمارٹ فون رکھ کر کال کرنا یا اسکرین دیکھنا اب ممنوع قرار دیا گیا ہے اور اس پر قرار واقعی سزا بھی دی جاسکتی ہے۔
ٹریفک حکام کے مطابق سائیکل سواروں کے موبائل اسکرین دیکھنے کی وجہ سے کچھ حادثات پیش آئے ہیں جس کے نتیجے میں متعدد افراد کی ہلاکتوں کی بھی اطلاعات ہیں۔
اگرچہ جاپان میں مجموعی طور پر ٹریفک حادثات کی تعداد میں کمی واقع ہو رہی ہے، لیکن ان حادثات میں سائیکلوں کا تناسب بڑھ رہا ہے۔ جاپان میں دیگر کئی ممالک کے برعکس، فٹ پاتھ پر سائیکل چلانا نہ صرف قانونی ہے بلکہ ایک عام سی بات ہے۔
اس کے علاوہ نئے قوانین کے تحت نشے کی حالت میں سائیکل چلانے پر تین سال تک قید یا 5 لاکھ ین تک بھی جرمانہ عائد کیا جا سکتا ہے۔
یاد رہے کہ جاپان میں سائیکل کا استعمال بہت عام ہے تاہم 2021 میں کورونا پابندیوں کے بعد سے اس کے استعمال میں کافی اضافہ ہوا اور اب شہریوں کی اکثریت پبلک ٹرانسپورٹ کے بجائے سائیکل استعمال کرتی ہے۔
